Rainier gilaba-nan ni Ai-ai

Gipanalipdan sa comedy queen nga si Ai-ai delas Alas ang sikat nga starstruck graduate nga si Rainier Castillo gikan sa mga intriga nga gibato ngadto kaniya.

Una nang nabalita dinhi sa Banat Entertainment nga gisapot si Ai-ai sa youngstar tungod kay labihan ka dugay niini nga nitunga sa ilang shooting alang sa pelikulang "Shake Rattle and Roll" nga gigaling ubos sa Regal Films.

Suma pa nga alas onse sa buntag ang call time alang sa nahisgutang shooting apan namuti og maayo ang kalimutaw ni Ai-ai tungod kay alas otso na sa gabii miabot ang aktor.

Tungod niadtong maong insidente gipasanginlan si Rainier sa mga movie critics nga "very unprofessional" ug walay konsensya busa mirese nga nakasab-an siya ni Ai-ai.

Apan ning bag-o lang gidepensahan ni Ai-ai si Rainier pinaagi sa pag-ingon nga dili lang ang youngstar maoy angayan nga basolon kon dili lakip na ang handler niini nga empleyado sa GMA-artist center.

Nagkanayon si Ai-ai nga kon gitarong pa lang sa handler ang schedule ni Rainier dili unta magtanga og pinaabot didto sa set ang ubang mga artista nga kabahin sa pelikula.