Pokwang mihilak atubangan sa kamera

Taliwa sa pagka komedyante ni Pokwang atubangan sa camera mabaw diay kini og luha og dali nga mohilak kong mahisgotan ang personal niya nga kinabuhi.

Sama na lang sa dihang gipangutana sa Cebu Press niadtong Biyernes unsa kapait ang manginabuhi sa gawas sa nasud diin wala malikayi ni Pokwang ang paglakbit saysay sa iyang kasinatian.

Nakatrabaho diay si Pokwang kaniadto sa Abu Dhabi balig unom ka buwan diin atol nga namatay ang iyang siyam ka tuig nga anak dinhi sa Pilipinas.

Suma pa niya wala siya maka attend sa lubong niini gumikan kay duna siyay kontrata nga gitamdan diin mahimo nga siya maoy madaot kun iya pa kining gisupak.

Ang nahitabo mao nga gitabangan siya sa mga Pinoy didto sa Middle East hinungdan nga nakapada siya og dako nga kantidad dinhi sa nasud alang sa lubong sa iyang anak.

Si Pokwang dinhi sa Sugbu niadtong Biyernes kauban sila si John Lloyd Cruz og Aga Muchlach ang duha ka bida sa labing dako nga pelikula karong tuiga ang "Dubai" nga gi-produce sa Star Cinema.

Atol sa press conference didto sa Casino Filipino sa Waterfront Hotel Lahug gipanghimakak ni Pokwang ang taho nga siya maoy hinungdan nganong wala nay proyekto ubos sa abs-cbn ang comedy queen nga si Ai-ai delas Alas gumikan kay iya kining gibabagan.

Suma pa ni Pokwang nga imposible kining mahitabo gumikan kay ang tinuod padayon pa siyang nagpaabot og mga dagko og maayo nga mga proyekto.

Iyang gitataw nga dili sila angayan nga awayon ni Ai-ai gumikan kay dako siya og respeto sa naulahi gawas pa nga artista og sikat na kining daan sa wala pa siya masulod sa industriya pipila pa lang katuig ang nilabay.