John Lloyd nangangkon nga loveless

Nangangkon nga loveless ang matinee idol nga si John Lloyd Cruz sa dihang gisukit-sukit niadtong Biyernes atol sa press conference didto sa Casino Filipino sa Waterfront Lahug alang sa ilang pelikula nga "Dubai".

Bisan kinsa nalang nga ngalan ang migawas og gilambigit kang John Lloyd apan ang naulahi igo lang nipahiyom og sa kadugayan nangangkon nga wala siyay uyab sa pagkakaron.

Suma pa niya nga ang iyang loveteam nga si Bea Alonzo usa lang ka "dear friend" samtang si Ciara Sotto kabahin nalang sa iyang kagahapon.

Swerte si John Lloyd kon buot huna-hunaon gumikan kay nakauban niya si Aga Muhlach og Claudine Barreto lakip na ang batikan nga direktor nga si Rory Quintos sa labing unang higayon.

Busa matud niya gihatag na niya sa pelikulang "Dubai" ang tanan nga iyang mahimo acting wise tungod sa ka nindot sa oportunidad nga iyang naangkon.

Hinuon puros pagdayeg ang naangkon ni John Lloyd gikan kang Aga kinsa nagkanayon nga maayo kaayo ang acting nga gipakita ni John Lloyd sa pelikula sanglit daghan man siya og nakat -onan sa batan-ong aktor.

Si John Lloyd sa iyang bahin niingon nga si bisan kinsa kadtong gusto nga magdugay sa industriya kinahanglan lang nga magpaniid kang Aga tungod kay ang naulahi dunay hiyas sa pagka mapahiubsanon nga maoy sekretong hinagiban aron magmalampuson sa showbiz.