Bianca King wala mauyoni

Wala diay uyoni sa kadagkuan sa GMA-7 si Bianca King aron himoong co-host sa usa ka dance show nga adto isalida sa Channel 11 sugod karong Nobiyembre.

Pagaulohan og "Ultimate Celebrity Dancer" ang nahisgutang show gitumong gyud unta alang kang Charlene Gonzales ubos sa direksyon sa sikat nga choreographer nga si Maribeth Bichara.

Wala musugot ang ABS-CBN nga dunay proyekto si Charlene sa GMA-7 busa ang producer sa maong show mituboy kang Pop prince Jay-R ug Bianca isip hosts.

Apan si Jay-R lang ang nagustuhan sa mga executives sa GMA-7 busa sa higayon nga magsugod na unya kini lain-laing female guest hosts ang itugbang sa prince of Pop matag semana.

Presko pa ang samad sa kahiubos nga gibati sa mga kadagkuan sa GMA-7 human nga dili pa lang dugay nikalit og biya si Bianca sa ilang poder ug nibalitok sa nataran sa ABS-CBN.

Kini gumikan kay nangluod siya nga wala maangkon ang role nga gihatagan karon og kinabuhi ni Chynna Ortaleza sa "Sugo" nga matud pa unang gi-offer ngadto kaniya.

Apan ning bag-o lang nibalik ra gihapon si Bianca sa poder sa Kapuso network diin nalakip na usab siya sa SOP Gigsters ingon man sa "Sugo" isip babaye nga mamarang.