Minsan pa naparot didto sa Japan

Napildi sa bag-o pa lang natapos nga First Asian Marine Film Festival didto sa Makuhari City, Japan ang pelikulang "Minsan Pa" nga gibitoonan nila ni Jomari Yllana ug Ara Mina.

Apan malipayon gihapon ang direktor niini nga si Jeffrey Jeturian gumikan sa pagdayeg nga naangkon sa pelikula diin kasagaran sa nakakita nipato gyud sa ilang mga luha.

Gitug-an ni Jeturian nga ang festival organizer labihang nakadayeg sa estorya sa nahisgutang pelikula gani ang assistant niini kalit lang nawala atol sa second screening tungod kay nidagan kini padulong sa pansayan og nidangoy-ngoy paghilak.

Ang entry sa mga nasud sa Vietnam/France ug Belgium nga giulohan og "Buffalo Boys" maoy niguwang mananaug ug nasayran nga nakakuha na kini og special Jury prize sa 2004 Locarno Film Festival didto sa Switzerland.

Ang Minsan Pa gigama ubos sa MLR Films nga gipanag-iya sa Sugbuanong si Atty. Jojie Alonzo diin kasagaran sa mga eksena dinhi sa Sugbu gi-shooting.

Kini ang katapusang pelikula nga gibitoonan ni Jomari ug Ara sa wala pa sila mag-away ug hingpit nga nagkabuwag.