Marco Alcaraz, dili pa sigurado alang sa All about men

Wala pay klaro kung mahinayon ba ang partisipasyon sa Sugbuanong si Marco Alcaraz sa stage play nga All About Men…Penis Talks Reload gumikan kay kinahanglan pa niyang mananghid sa iyang tunghaan.

Si Marco kansang pamilya nanimuyo sa barangay Guadalupe senior student sa kursong Management sa San Sebastian College nga usa ka catholic school didto sa kaulohan busa medyo dyahe gumikan kay sensitibo ang tema sa maong stage play.

Gawas pa kuwang sa oras ang batan-on alang sa rehearsal gumikan kay gawas sa klase puno usab ang iyang schedule alang sa taping sa Kampanerang Kuba diin papel sa usa ka bodyguard ang iyang gidala ug love interest siya ni Jodie Santamaria.

Hinuon gipaabot nga dili sila maintriga gumikan kay klaro naman nga nagsabak si Jodie sa ilang umaabot nga anak ni Pampi Lacson.

Kung dili gyud mahinayon si Marco sa Penis talk, maaninaw gihapon ang iyang makatulo laway nga lawas gumikan kay usa siya sa featured hunks sa October special issue sa Cosmpolitan magazine.

Si Marco unang naila sa soap opera nga It Might Be You diin nahimo siyang bana ni Bea Alonzo. Una niyang pelikula ang Birhen ng Manaog diin love interest usab niya didto si Jodie.