Katrina Halili ug Mikey na?

Gikataw-an lang sa maanyag nga starstruck avenger nga si Katrina Halili ang tsismis nga siya na karon ang bag-ong uyab ni controversial first son Mikey Arroyo.

Ang maong anggulo nitumaw human nigawas ang taho nga gigasahan ang aktres og Luis Vuitton nga shoulder bag ning bag-o lang apan hugtanong gipanghimakak ni Katrina ang maong tsismis.

Si Mikey ug Katrina dunay pelikula nga nag-ulohan og "Sablay Kana Pasaway Ka Pa" diin kauban nila si Ethel Booba og ubay-ubay nga mga kongresista.

Giangkon hinuon ni Katrina nga sa dihang gigaling pa ang nahisgutang lilas kanunay nga magpada og pagkaon ang kongresista sa set apan alang kadto kanilang tanan.

Samtang atol sa presscon alang sa nahisgutang lilas didto sa kaulohan dili pa lang dugay, wa kapugngi sa aktres ang pagdagayday sa iyang mga luha gumikan sa kahiubos.

Kini tungod kay iyang nahinumduman ang mga reaksyon sa iyang mga kritiko nga namahayag kaniadto nga wala siyay kaugmaon sa showbiz kung dili siya modawat og mga sexy roles.

Suma pa ni Katrina nga ang maong pelikula maoy buhing kamatuoran nga dili na siya kinahanglan nga magpa sexy aron mosikat og aron makabaton og mga proyekto.

Ang batan-ong aktres lakip sa batch one sa reality based show Starstruck sa GMA-7 isip finalist ug usa karon sa labing visible nga youngstars ubos sa GMA-Artist Center.