Mahal ug Mura lovers na

Daghan ang nakilig ug nalipay sa mga huhungihong nga nagkauyab na si Mahal ug Mura gani duna na silay planong magpakasal sa dili pa matapos ning tuiga.

Suma pa nga niadto pang buwan sa Hulyo gidawat ni Mahal ang gitanyag nga gugma ni Mura ngadto kaniya gumikan kay iyang nahunahuna nga wala gyuy laing lalaki nga magmatinud-anon kaniya kundili ang iya lang kanhi partner sa "MTB ang Saya-saya."

Gikatakda nga mobalik ang duruha dinhi sa nasud karong Oktubre human sa ilang series of shows didto sa Japan aron yak-an ang mga detalye sa ilang pagpakasal.

Daghan ang nalipay sa maong taho nga nagkasinabtanay na ang duruha gumikan kay bisan unsaon og tan-aw angayan man silang pareson.

Ang mga dalan ni Mahal og Mura unang nagtagbo sa "MTB Ang Saya-saya" diin nahimo silang attraction sa nagkadaiyang segments sa nahisgutang show.

Apan ang packaging sa duruha mao nga managsuon sila nga mga babaye diin wa dangti og dugay nitumaw na ang mga sungog-sungog nga naibog si Mura kang Mahal.

Wala kini sakyi sa duruha gani nalambigit man si Mahal sa daghan nga mga lalaki diin gituohan nga gihukhukan lang siya samtang si Mura seryoso sa trabaho sa pangandoy nga mahaw-as niya ang iyang pamilya gikan sa kawad-on.