Hollywood ang target

Human sa successful premiere sa "The Great Raid" didto sa Washington, D.C, di pa lang gyud dugay diin mga dagkong opisyal sa gobyerno sa Amerika ang nanambong, si Pinoy actor Cesar Montano nagtinguha na karon sa pag-invade sa Hollywood.

Si Cesar usa sa leading stars sa "The Great Raid" nga giilang usa ka importanteng Hollywood movies. Gihimo kini sa Miramax Films sa US.

Matud ni Cesar nagplano siya sa pag-relocate ngadto sa Los Angeles gikan sa Pilipinas. Nagplano sab siya sa pagkuhag agent nga motabang kaniya sa pagsud sa Hollywood.

Inspirado si Cesar tungod kay daghang kritiko ang midayeg sa iyang acting sa "The Great Raid" diin midala siya sa papel sa usa ka Pilipinong opisyal sa girelya movement sa Luzon atol sa World War II.

Manghinaot kita nga makaangkon og kalamposan ang handum ni Cesar to make it big sa Hollywood.

* * *

Si Comedian Ai Ai de las Alas gikutlo nga nag-ingon nga bisan di siya pakaslan sa iyang uyab nga Kano andam siya makigpuyo niini.

Handum kuno niya nga makaanak og tisoy/tisay nga dunay blue eyes sama sa eyes sa iyang boyfriend nga Kano.

Tungod kay komedyante si Ai Ai, daghan sa iyang fans nagtuo nga nagkomedya ra siya ning iyang pag-ingon nga andam siya makigpuyo sa Kano bisan way kasal-kasal. Joke, joke, joke lang, Ai Ai?

* * *

Congratulations to Banat News editorial staff on the occassion of the paper's 11th year this month.

Dako kong dungog nga usa ko sa labing unang entertainment writers sa BN. Pagsugod-sugod gyud niining igsoon nga mantalaan sa The Freeman niabot na ko dinhi. Kadungan ko si Manang Kriss Relatado. Kun 11 years na ang BN, 11 years nasad mi nga sakop niini.