Bisan kuno'g dili siya pakaslan sa Amerikano

Wa ipasigarbo ni Ai Ai de las Alas nga may nahitabo nang milagro sa relasyon nila ni Art Carter, ang bag-o niyang boyfriend nga Amerikano, apan mapagarbohon siyang miingon nga, "sa katapusan, may anak na gyod kong blue og mga mata nga maoy akong gipangandoy." Kay nagtuo man siya nga asul og mata unya ang mahimong anak nila ni Art, ang Amerikano nga, sa una nilang pagka kaila, wa masayod nga usa ka celebrity si Ai Ai dinhi sa Pilipinas, hinungdan man gani nga wa motan-aw si Art sa concert ni Ai Ai kay wa siya makaila.

Didto na motan-aw si Art sa show ni Ai Ai sa Hawai, pila na ka adlaw ang nakalabay human sila magkasuod og nakaamgo na siya nga sikat diay si Ai Ai.

Matud ni Ai Ai, okay lang niya, bisa'g dili sila makasal, basta makaanak lang gyod siya'g asul ang mata. Asul ang mga mata ni Art Carter, usa ka negosyante nga tag-iya sa Arbour Specialist.