Radio station technician na peace advocate, itinumba
MANILA, Philippines — Patay ang senior technician ng isang Catholic-run radio station sa Cotabato City na isa ring peace advocate makaraang pagbabarilin ng hindi pa nakilalang mga armadong salarin sa Maguindanao del Norte nitong Martes ng gabi.
Kinilala ang bikima na si Dennis Pido, 56, radio technician ng DXMS-AM/DXOL-FM ng Notre Dame Broadcasting Corporaton (NDBC) na pag-aari ng Oblates of Mary Immaculate, at residente ng Pigcawayan, North Cotabato.
Ayon kay Captain Steffie Salanguit, spokesperson ng Police Regional Office-Bangsamoro Autonomous Region (PRO-BAR), idineklarang dead-on-arrival si Pido ng mga dokctor sa hindi kalayuang Cotabato Sanitarium General Hospital sa Barangay Pinaring sa Sultan Kudarat kung saan siya dinala ng mga emergency responders upang malapatan sana ng lunas.
Sa ulat ng Maguindanao del Norte Police, nangyari ang krimen sa Brgy. Limbo, Sultan Kudarat dakong alas-3:50 ng hapon.
Sinabi ni Salanguit, habang minamaneho ni Pido ang kaniyang Honda CRF 300 motorcycle patungo sa kaniyang trabaho nang harangin ng riding-in-tandem suspects.
Armado ng hindi pa natukoy na kalibre ng armas, pinagbabaril ng backrider na nagsilbing hitman ang biktima saka mabilis na nagsitakas.
Nagtamo ang biktima ng apat na tama ng bala, tatlo rito ay tumagos sa kanyang puso na kanyang ikinamatay.
Kinondena naman ni Drema Quitayen Bravo, DXMS-AM/DXOL-FM station manager, ang pag-atake sa nasabing biktima at hiniling sa pulisya na imbestigahang mabuti ang kaso, arestuhin ang mga salarin upang mabigyang hustisya ang sinapit ng kaso.
- Latest
