Master plan alang sa gisugyot nga NCEZ Giduso

CEBU, Philippines — Giduso ni Cebu Vice Governor Glenn Anthony Soco ang paghimo og komprehensibong master plan alang sa gisugyot nga North Cebu Economic Zone (NCEZ) aron madani ang mga mamumuhunan ug makamugna og dugang trabaho sa amihanang bahin sa lalawigan.

Giawhag ni Soco ang nagkadaiyang ahensiya sa gobyerno ug mga stakeholder nga magtinabangay sa pag-andam sa plano nga mahimong giya sa pagpalambo sa ekonomiya sa North Cebu.

Tumong sa gisugyot nga economic zone nga mapalapdan ang mga oportunidad sa ekonomiya ngadto sa mga lugar gawas sa kasamtangang mga sentro sa negosyo ug industriya sa Sugbo.

“Cebu’s economic growth should not be concentrated in only a few areas. We need to create new growth centers where investments can come in, industries can expand, and more Cebuanos can find quality jobs closer to home,” matud ni Soco.

Lakip sa mga industriyang posibleng makapahimutang sa maong economic zone ang manufacturing, logistics, information technology ug business process management (IT-BPM), nga gilaom nga makatabang sa pagmugna og trabaho ug pagpalihok sa lokal nga ekonomiya.

Kabahin sa gisugyot nga master plan ang pag-ila sa angay nga mga lugar alang sa kalamboan, pagtino sa mga industriyang prayoridad ug pagtimbang-timbang sa imprastraktura ug mga pasilidad nga gikinahanglan aron suportahan ang operasyon sa mga negosyo.

Lakip sa mga kinahanglanon aron madani ang mga mamumuhunan ang kasaligan nga imprastraktura, suplay sa kuryente ug tubig, maayong telekomunikasyon ug episyenteng proseso sa gobyerno.

Dugang ni Soco nga dili igo ang pagpili lamang og lugar aron matukod ang economic zone. Kinahanglan usab kini og maayong pagplano, klarong direksiyon ug koordinadong aksiyon sa mga ahensiya sa gobyerno ug ubang hingtungdang sektor.

Kinahanglan usab nga ikonsiderar sa master plan ang kaayohan sa mga komunidad nga mahimong maapektuhan, pagpanalipod sa kinaiyahan, pagpangandam sa mga trabahante ug kapasidad sa lokal nga mga kagamhanan sa pagsuporta sa pag-uswag sa ekonomiya.