Sukmat sa Semana Santa
Ambot epekto na ba sa kamahal sa diesel ug gasolina, hapsay ang trapiko sa among pagbisita sa habagatang Sugbo sa niaging weekend. Pero nahugno kay amo gihapong nakita ang walay kahumanan sa pag-ayo ug pagkaguba sa kadalanan sa una ug ikaduhang distrito:
Guba gihapon ang kadalanan sa Sibonga;
Wala gihapon masumpayi og dalan ang nahuman na nga taytayan sa Argao;
Nagsugod na og liki ug buslot ang bag-ong gisemento nga kadalanan sa Boljoon; ug
Makalilisang nga mga libaong gihapon ang mosugat sa lokal ug langyaw nga mga turista sa Oslob.
* * *
Mahimo bang ipasabot nilang Kongresista Rhea Gullas sa unang distrito ug Kongresista Edsel Gallos sa ikaduhang distrito ug sa kadagkoan sa Department of Public Works and Highways ug sa ubang lokal nga mga opisyal:
Nganong sige ra man og kaguba ang ilang kadalanan, nga bisan ang sementadong mga bahin nga molungtad unta og daghang katuigan ma-ampaw man dayon sa pila lang ka buwan; ug
Nganong ang mga ekipo ug mga trabahante sa mga kontraktor sa gitrabaho nga mga bahin sa nasudnong highway mas daghan mang pahuway kay sa lihok?
* * *
Mahimo hinuon nga isnabon lang nila kining kabos namong hangyo. Kay sama sa ubang mga politiko sa Sugbo wala gyod silay tingog bisan ek na lang sa sibaw nga mga pangutana sa mga Sugbuanon unsay gigastohan sa binilyon ka pesos sa allocables ug non-allocables sa ilang mga distrito.
Pero namasin lang kining amo. Kay Semana Santa man gud karon. Hinaot nga ang kabalaanon sa mga adlaw sa paghandom sa pagsakripisyo ni Hesukristo mokusi sa ilang mga konsiyensiya.
* * *
Walo ka buwan na human sa “Mahiya naman kayo!” nga State of the Nation Address ni Presidente Ferdinand Marcos Jr., wala pa gihapoy bisan usa nga nakiha, napriso ug nasilotan sa mga opisyal sa gobyerno ug mga kontraktor nga gipasanginlan nga apil sa kinawatay sa flood control ug ubang infrastructure projects sa Sugbo.
Kon nagtuo si Marcos Jr. ug ubang mga politiko nga makalimot na ta sa P1.7 trilyones nga flood scam, ang mga biyahe gikan ug paingon sa Metro Cebu ug habagatang Sugbo kanunayng mopahinumdom sa mga magbubuhis giunsa sila sa pagtulis sa atubangan.
* * *
- Latest
