Killer nalambigit sa illegal drugs

CEBU, Philippines — Aduna nay tawo nga gidudahan ang kapulisan sa dakbayan sa Talisay nga maoy nagpusil patay sa 14-anyos nga babaye sulod sa ilang panimalay sa V.H Garces Barangay Consojong samtang kini nag-module niadtong Biyernes sa buntag.

Sigon ni Police Lieutenant Colonel Gerard Ace Pelare, tigpamaba ni Police Regional Office(PRO)-7 ang suspek giingong nalambigit sa illegal nga drugas ug suod kini sa biktima.

Wala na mohatag pa og dugang impormasyon ang kapulisan labot sa identity sa suspect sanglit padayon pa ang ilang hot pursuit operation aron kini madakpan.

 “I was assured by the Chief of Police nga naay gagukod, naay hot pursuit operations team nga nag focus para madakpan ang suspect….Nag-supervise ang PRO-7, kung mogawas gani siya sa AOR sa Cebu Province naa nay coordination sa with other police offices,” sigon ni Pelare.

Gipahupay hinuon ni Pelare ang mga kasing-kasing sa publiko mahitungod sa maong linoog nga krimen diin usa ka bata ang biktima ug diha pa gyud mismo sa ilang balay kini gipatay samtang nagtuon sa iyang modules sa eskuylahan.

Matud ni Pelare dili alarming ang maong insidente apan giangkon niya nga kini linoog nga krimen.

Gitan-aw gyud og maayo sa kapulisan ang mga sirkumstansiya sa tanang impormasyon nga ilang nakuha sa imbestigasyon subay sa bacgkground sa biktima ug sa mga tawo sa palibot niini.

“Wala tay gi impose nga timeline but the instruction of the Regional Director to ensure nga madakpan ang perpetrator, maka establish ta og lig-on nga kaso aron maka file ta og kaso nga maka convict gyud sa suspect,” ni Pelare pa.

Nakig-alayon sab ang pamilya sa biktima nga giingong mo-execute og affidavit.

Posible nga sa sunod semana ipasaka na sa Talisay City Police Station ang kaso batok sa suspek sanglit giandam na nila ang mga ebidensiya nga nakuha samtang nagpadayon ang hot pursuit operation.

Sa pikas bahin ang Department of Education (DepEd) nasubo sa nahitabo sa tinun-an ug mipadayag kini og tumang kabalaka nunot niining mga sagunsong mga insidente sa mga linoog nga krimen nga ang mga biktima mga kabataan ug mga babaye.

Matud sa ahensiya, batakang katungod sa tanang kabataan nga makapadayon sa ilang pagtungha nga walay kahadlok sa ilang seguridad, bisan sa eskuylahan pa o sa ilang balay.

"We urge the local authorities and the community to come together in solidarity against violence and to ensure the safety of all learners,” matud pa sa DepEd.  IBM BANAT NEWS