Rama giintriga, pabilin ang suporta kang Panuglong Marcos

CEBU, Philippines — Kusganon gipasalig ni Cebu City Mayor Michael Rama kang Presidente Ferdinand "Bongbong" Marcos Jr.  ang  padayon niyang suporta sa lider sa nasud ug sa administrasyon niini.

Ang pamahayag ni Rama iyang gihimo human matud pa adunay mga tawong kritiko sa iyang pamunoan sa siyudad nga naghatud og mga  intriga aron ikalain sa presidente sa nasud.

Matud pa nga ang intriga nag-ingon nga giputol na niya ang iyang pakig-alayon sa mga Marcos.

Ang mayor nitug-an ang Dakbayan sa Sugbo ubos sa iyang liderato hugot ang suporta kang PBBM ug lakip usab mga programa niini.

Ang mayor nipadayag nga nadawat siya og impormasyon nga adunay usa sa iyang mga kritiko ang nihatag og sayop nga impormasyon ngadto kang Executive Secretary Lucas Bersamin nga giingong giputol na niya ang pakig-alayon sa Marcos ug pabor siya ngadto kang Vice President Sara Duterte.

Bisan pa sa bag-ohay nga panagsangka tali sa mga kampo ni Marcos ug Duterte pinaagi sa kanhi presidente Rodrigo Duterte, si Rama miingon nga wala kini makaputol sa iyang loyalty sa presidente ug sa nasud.

Apan giklaro niyang nagpabilin siya nga higala sa mga Duterte, ilabi na kang Bise Presidente Sara Duterte.

Ang mayor nag-ampo usab alang sa panaghiusa sa politika samtang ang nasud nagpadayon sa pag-atubang sa daghang mga krisis sa ulahi.

Gipahinumdoman usab niya ang iyang mga kritiko nga nag-akusar kaniya sa pagkadili-maunongon sa pagtan-aw sa ilang kaugalingon diha sa samin. IBM BANAT NEWS