Tigpamusil sa di ka-remit nadakpan

CEBU, Philippines — Wala na makaipsot sa mga tinugyanan sa balaod ang 25 anyos nga lalake nga maoy namusil sulod sa Chinese cemetery, Barangay Carreta, siyudad sa Sugbo kay nagtingkagol na kini karon sa Mabolo Police Station human madakpan sa sulod sa menteryo sa maong barangay kagahapon sa alas-12 sa kaadlawon.

Ang suspek nga si Roy Mojado Monleon alyas Roy-Roy, 25, residente sa lugar maoy gitumbok nga nipusil kang Raymond Ruiz, 26 , nga iyang siligan.

Una nang gibutyag sa kapulisan sa Mabolo Police Station nga dunay kasuko ang suspek ngadto sa biktima.

Sigon ni Police Major Romeo Caacoy Jr., Hepe sa Mabolo Police Station dunay nakasumbong nga ang suspek nibalik sa maong lugar hinungdan nga ilaha kining giadto ug nadakpan.

Nakuha gikan sa suspek ang .9mm nga armas nga maoy gigamit matud pa sa pagpusil sa biktima ug tulo ka medium-size nga putos sa gituohang shabu sanglit giingong nalambigit sab sa illegal nga drugas ang suspek.

Ang suspect matud pa maoy responsable sa mga shooting incidents sa dapit ilabi niadtong dili maka-remit sa halin sa drugas sa iyahang agalon,  gawas niini mangunay sab og tulis sa iyang mga silingan.

“Naa toy mga impormasyon mao lagi ang dili makabayad maoy iyang pamusilon,” sigon ni Caacoy pa.  Kasong kalapasan sa Section 11, Article sa Republic Act 9165 ug Republic Act 10591 ang ipasaka batok sa suspetsado. IBM BANAT NEWS