"Summer in December"

Kana maoy caption ni Sue Ramirez niining mga hulagway nga iyang gi-upload sa IG kagahapon ug kuha gihapon sa Bantayan Island. Nia sa Sugbo si Sue kanunay sanglit ania dinha kuhaa ang taping sa ABS-CBN series nga Iron Heart nga gibituonan ni Richard Gutierrez. Si Sue ang leading lady ni Richard, diin apil sab niini sila si Jake Cuenca, Dimples Romana, Enzo Pineda, Sofia Andres, Meryll Soriano ug daghan pa.

Sweet gihapon uy

Gibaraw nila ni Cherie Pie Picache ug Edu Manzano ang intriga nga nagbulag na sila. Kini pinaagi sa pagpost og mga hulagway nga kuha sa usa ka party kauban ilang pamilya ug mga higala diin sweet sila kaayo. Nitumaw ang intriga sanglit tulo na ka bulan nga walay kisaw ang ilang social media accounts nga unta kanunay man sila mag-upload og sweet photos nilang duha. Nan, nasupla ang mga marites sanglit dili lang sila sweet sa photos, naghagwaay pa gyud sa comments section.

Natarantar kadiyot

Medyo natarantar si Dimples Romana sa premiere night sa ilang Metro Manila Film Festival entry, ang "My Father, Myself" niadtong December 19. Tsika sa PEP, nagmask gyud si Dimples ug medyo nidistansya sa mga tawo. Human sa salida, nangayo siya og dispensa dungan sa pag-angkon nga medyo natarantar gyud siya kay first time niya nga nitambong og event nga daghan gyud kaayong tawo human sa pandemic. Nagmatngon pa siya niya pa sanglit aduna pa siyay baby nga ulion human sa maong event.

Dili na mausab

Nagsorry ang bandang Ben & Ben ngadto sa ilang fans nga dismayado sa ka gubot o ka disorganize matud pa sa concert sa nahisgutan niadtong Domingo didto sa kaulohan. Gihulagway sa fans nga "stressful experience" ang pagsulod nila sa concert gumikan kay wala matud pay klarong proseso. Gisaad sa banda nga dili na masubli pa ang nahitabo puhon sanglit sila na mismo ang mangunay gyud pag-organize niini. Gibana-bana nga 65,000 ka fans ang naghugop isip pagsuporta sa maong homecoming concert.