Okey ang SK

Alang sa Oktubre 28 nga barangay ug Sangguniang Kabataan (SK) election, ang Commission on Elections (Comelec) mohugpong pag-usab (recluster) sa kapin sa 78 mil ka hinugpong nang mga presinto.

Niadtong Mayo nga piniliay, ang labing daghan usa ka libo ka mga botante gikan sa lima ngadto sa pito ka mga presinto gihugpong ngadto sa usa nalang ka presinto.

Niining umaabot nga eleksiyon ang clustered precinct nga dunay presinto sa SK aduna lamay labing daghan upat ka mga presinto nga adunay 500 ka mga botante. Kun wala’y presinto sa SK aduna lamang kini 400 ka mga botante.

Ang rehistrasyon sa mga botante sa eleksiyon sa barangay ug SK himoon karong Hulyo 22 ngadto sa 31. Ang kwalipikado mao kadtong nag-edad og 15 ngadto sa 18 sa dili pa ang adlaw sa pinilay alang sa SK. Ang mga botante sa barangay kinahanglang magpangidaron og labing minus 18 anyos.

* * *

Anaay mga sektor sa katilingban nga buot nga papason na kining SK. Sumala nila nga wala kini maayong nahimo sa komunidad hinonua pulos tinunto ug wala’y pulos ang ilang gibuhat.

Gani si Kong. Pablo Garcia ug si Kong. Gunigundo nipasaka og balaudnon sa pag-undang sa SK kay bata pa kuno kaayo sila nga mohimo og mga butang legal sama sa paghimo’g balaud. Mao usab kini ang baruganan nila ni Sen. Edgardo Angara ug kanhi Sen. Pres. Juan Ponce Enrile.

Apan dili ba ang mga politiko ra man usab ang nagtudlo niining mga SK og binuang? Bisan gani ang managan sa SK mga paryente ra sa mga politiko kun dili man gani ilang tinuboy. Unya nganong nangreklamo na man sila karon?

Kun adunay apan ang SK mas daghang tinunto sa senado ug sa ubos balay-balauranan? Grabe usab ang korupsiyon sa Bureau of Internal Revenue (BIR), Department of Public Works and Highways (DPWH), Bureau of Customs (BOC) ug ubang mga departamento sa gobiyerno. Nganong dili man nato undangon ang maong mga buhatan?

Nagkinahanglan lamang og reporma ang SK kay alang kanako okey kini.

* * *

Abi nako og ang diplomat usa ka tarong nga tawo. Magbantay sila bisan gani sa pagsulti ug sa ilang gamiton nga mga pulong. Taas usab ang akong pagtan-aw sa mga labor attaches sa mga embahada.

Mao nga nakurat ako niining balita nga anaay mga labor attache ug mga sakop sa embahada sa Saudi Arabia, Kuwait, Jordan, Syria ug ubang mga nasud sa Middle East nga nipahimus sa mga babayeng Filipino nga nagtrabaho sa maong mga dapit nga nagkinahanglan sa ilang panabang.

Kadaghanan hinoon sa gipasanginlan mao ang mga labor attache apan dihay embahador nga gilambigit sa maong binuang.

Dili pagpahimus lamang sa ilang pagkababaye ang gihimo kun dili gibaligya pa gayud sila ngadto sa ubang mga tawo aron makakita sila’g salapi alang ipliti balik sa Pilipinas.

Hinaut unta nga susihon gayud ang kinauyukan niining maong isyu aron masilotan ang mga mapahimudsanon ug ingon man malimpiyohan ang ngalan sa mga wala’y labut. Dugay na man diay kining gipraktis sa mga embahada didto.

Unsa man diay gibuhat ni Bise Presidente Jejomar Binay nga maoy presidential adviser on overseas workers’ concerns?

* * *

Email: [email protected]