Naisahan ni Atty. Rosell ang iyang mga kontra

Kong wala ko masayop, unang higayon nga nahitabo sa dakbayan sa Sugbo nga adunay usa ka dinakpan sa otoridad nga wala pa gani napasakaan og kaso apan nakapyansa na. Mahimo ra man diay kong gamiton lang gyud ang balaod sa pagprotehir sa katungod sa usa ka tawo aron dili matanggong sa bilanggoan kay mahatagan man og temporaryong kagawasan.

Si Atty. Collin Rosell lang ang nakahimo niini dihang giaresto siya sa kapolisan sulod sa Cebu City Hall tungod sa pasangil nga nakahimo siya og usurpation sa katungdanan kay lagi giinsister niini nga siya pa gihapon ang city administrator ug gikinahanglan nga mobalik na siya human sa unom ka buwan nga preventive suspension sa Ombudsman.

Nakamugna og tensiyon ang pagbalik ni Rosell sa City Hall ilabi na dihang gipamugos niya ang iyang katungod kay lagi alang kaniya wala man siyay labot ugaling na dismiss man si Mayor Mike Rama sa katungdanan tungod sa kasong nepotismo. Apan gibarugan sa kampo ni Mayor Raymond Garcia nga coterminous man si Rosell ni Rama busa wala na kiniy legal personality sa city government ug duna nay laing city administrator nga nag function nga si Atty. Christine Batucan.

Naposasan gyud si Atty. Rosell ug mismo ang hepe sa Cebu City Police Office ang nidakop kaniya ug gidala gyud sa presento 3 diin didto unta siya tanggongon, apan tungod sa mga bisitang abogado wala gyud siya makatilaw og selda sama sa ubang mga yanong tawo nga napasanginlan nga nakasala.

Biyernes siya naaresto diin nagdahum ang tanan nga makatulog gyud si Rosell sa presohan kay sa Lunes pa man masang-at ang kaso sa piskalya ug moagi pa sa proseso ayha moabot sa korte nga maoy mopagawas og warrant batok niya ug ayha pa makapyansa. Apan nakugang ang tanan nga giunsan man ni Rosell ang mga pulis ug ang city government.

Bisan og weekend, naproseso nila ang tanan kay giakomodar man siya sa korte ug sa laktod nga pag-estorya nilampos gyud ang legal nga lakang ni Atty. Rosell ug gimandoan sa korte ang kapolisan nga hatagan siya og kagawasan samtang nagpaabot nga hingpit mapasaka ang iyang kaso.

Karon ra ko nasayod nga mamahimo diay mo-function ang hukmanan kong adunay tawo nga nagkinahanglan. Ang gituohan sa uban mga imposible, dako man diay nga possible ug napamatud-an kini sa usa ka abogado sa dakbayan sa Sugbo. Kong gamiton lang ang katakos sa usa ka tawo nga nasayod sa balaod makapanalipod gyud diay kini sa katungod sa tawo nga adunay dinalian nga panginahanglan.

Basta bailable ang kaso mahimo ra diay nga ingon anion ang proseso. Seguro moingon ang uban nga nahatagan og kahigayonan sa hukmanan si Rosell kay basin gihatagan lang siya og special nga pagtagad, pwede seguro apan in fair ness sa abogado gigamit nila ang ilang malantip nga salabotan sa balaod aron dili kini maapiit sa kaso.

Karon nga aware na ang mga tawo nga mahimo ra diay kini, daghan na usab ang mosundog aron dili makatilaw og prisohan, busa nganong dili man suwayan sa uban ang gihimo sa kampo ni Rosell. Makaingon ta nga "kiniy abogado kursonada kaayo ug nahimo niya ang tanan nga kapanalipdan niya ang iyang kaugalingon."

Sinugdanan pa kini ug atong atangan ang sunod nga yugto niining drama karon sa dakbayan sa Sugbo.