Tinun-an nakuryentihan sa piso carwash

CEBU, Philippines — Patay ang usa ka 16-anyos nga Grade 11 nga tinun-an human kini gikatahong nakuryentihan sa piso carwash sa Barangay Butong sa lungsod sa Pinamungajan niadtong miaging adlaw.

Sumala pa sa report, ang 16 anyos didto sa carwash para hugasan ang motorsiklo, apan nakuryentihan kini ug daling gidala sa district hospital sa Pinamungajan apan gideklarar kini nga dead on arrival.

Sa report sa dyHP RMN Cebu,  si Police Master Sergeant Vincent Alquiza niingon nga giadto nila ang lugar kauban ang mga sakop sa Bureau of  Fire Protection sa lungsod ug gisusi ang lugar. Wala pay gihatag nga impormasyon ang kapolisan sa lungsod kung unsa ang resulta sa ilang imbestigasyon sa ‘car wash’ o kung duna ba silay nakitang ebidensiya nga dunay pagpabaya ug duna bay kalapasan ang tag-iya sa carwash. Sumala pang Alquiza andam silang motabang sa pamilya sa namatay kun desididong mopasaka og kaso ang pamilya niini.

Hinuon nasayran nga ang tag-iya sa maong carwash nga barangay kapitan nipasalig nga tabangan ang pamilya sa bata para mapahiluna ang lawas niini.— IBM BANAT NEWS