El Niño, magdudulot ng outbreak ng sakit sa pagkain-DOH
MANILA, Philippines — Nagpalabas ng abiso ang Department of Health (DOH) hinggil sa mataas na panganib nang mabilis na pagkapanis ng pagkain at food poisoning ngayong panahon ng El Niño.
Ang matinding init at mga posibleng brownout ay nagpapabilis sa pagdami ng bakterya sa mga lutong pagkain, hilaw na sangkap, at maging sa tubig.
Payo ng kagawaran, tiyaking laging malinis ang tubig na gagamitin sa paghuhugas ng mga kamay, sariwang gulay, karne, at iba pang kagamitan sa kusina upang maiwasan ang mga sakit na nagmumula sa pagkain.
Para sa inuming tubig, inirekomenda ng ahensya na pakuluan ito nang mabuti kung nag-aalinlangan sa kalinisan o kaligtasan ng pinagmumulan nito upang matiyak na ligtas ito sa mga mikrobyo at dumi.
Payo pa ng DOH na huwag hayaang nakabilad sa init o nakatiwangwang sa mesa ang mga lutong pagkain nang masyadong matagal, at ugaliing takpan o kaya ay ubusin agad ang mga ito upang makaiwas sa pagkalat ng mga nakasasamang organism.
Hinimok ng DOH ang lahat na maging mapagmatyag at sundin ang mga wastong pamamaraan sa kalinisan at pag-iimbak ng pagkain upang maprotektahan ang kalusugan ng pamilya laban sa mga posibleng outbreak ng sakit ngayong panahon ng tag-init.
- Latest















