Gin Kings mitagak sa Beermen, abante sa PBA Govs' Cup semis

CEBU, Philippines — Ang Barangay Ginebra Gin Kings nagmangtas sa katapusang kuwarter aron patikangkangon ang San Miguel Beermen, 110-94, sa tinagakay nga duwa sa ilang PBA Season 50 Governors’ Cup best-of-five quarterfinals niadtong Martes sa gabii didto sa Ynares Center Antipolo.
Alkansi og otso puntos sa halftime, 49-57, kanunay nga naggukod ang Gin Kings.
Apan mibugwak og kayo ang Ginebra sa pinal nga 10 minutos diin ilang gilabhan ang San Miguel, 34-14, nga miresulta sa 16 puntos nilang paghubog sa Beermen.
Tungod niini, ang Gin Kings mitikang sa semifinals diin ilang makasangka ang defending champion TNT Tropang 5G sa usa ka seguradong dumot nga rematch sa miaging Commissioner’s Cup finals.
Ang import nga si Jordan Murphy maoy nangu sa Ginebra uban ang double-double nga 31 puntos ug 11 ka rebounds.
Nanghugyaw sab si Scottie Thompson bitbit ang 29 puntos, walo ka rebounds ug lima ka steals ingon man si RJ Abarrientos, nga mitimbre og 19 puntos, lima ka assists ug upat ka rebounds. Si Nard John Pinto mitabang sab pagbitad sa Gin Kings ngadto sa Final Four uban ang nuybe puntos, duha ka steals, usa ka assist ug usa ka rebound.
Sa laing bahin, temporaryong mohunong ang aksiyon sa liga agi'g suporta sa kampanya sa Gilas Pilipinas sa Nobyembre nga window sa 2027 FIBA World Cup qualifiers batok sa Syria ug Iran.
Magsugod ang best-of-five semis unya pa sa Disyembre 4 diin ang Ginebra makigharong sa TNT ug ang NLEX Road Warrios makigbugno sa Converge FiberXers.
- Latest

















