Hinabol rider naka-hit and run sa anak
Ama patay sa kuyog!
MANILA, Philippines — Patay ang isang 31-anyos na ama matapos umanong pagtulungang bugbugin ng grupo ng mga kabataan na pinaniniwalaang kasamahan ng rider na nakabangga sa kanyang pitong taong gulang na anak sa Muntinlupa City noong nakaraang linggo.
Ayon kay Muntinlupa City Police Station Chief PCol. Olivia Ancheta, unang iniulat na nabagok lamang sa pagtakbo ang biktimang si alyas “Richard,” isang construction worker. Gayunman, lumabas sa mas malalim na imbestigasyon na nagtamo siya nang matinding pinsala sa ulo matapos paluin nang matigas na bagay.
Sa CCTV footage, makikitang hinabol ni Richard ang rider na tumakas matapos mabangga ang kanyang anak. Makalipas ang ilang sandali, grupo naman ng mga kabataan ang humabol sa kanya.
Batay sa imbestigasyon, pinagtulungang suntukin at paluin ng mga suspek ang
biktima. Hindi na nakunan ng CCTV ang mismong pananakit. Isinugod sa ospital si Richard ngunit binawian din ng buhay. Lumabas sa autopsy na nabasag ang kanyang bungo dahil sa matinding pinsala sa ulo, habang maayos naman ang kondisyon ng kanyang anak.
Natukoy na ng pulisya sa tulong ng mga saksi ang tatlong suspek na pinaghahanap na ngayon matapos sampahan ng murder complaint.
“Pinagtulung-tulungan po nila itong victim po natin. Pinagpapalo nila, pinagsusuntok. So talagang may intensyon po na patayin ang ating biktima,” pahayag ng opisyal.
Nanawagan ang kapatid ng biktima na si Rogelio sa mga suspek na kusang sumuko upang panagutan ang kanilang ginawa. Naulila ni Richard ang tatlo niyang anak na pawang mga bata pa.
- Latest
