P20,000 ayuda kuwang ra

CEBU, Philippines — Nireklamo ang usa sa mga apektadong residente sa demolisyon sa Barangay Ermita nga kuwang ra ang P20,000 nga ayuda gikan sa kagamhanan sa Dakbayan sa Sugbo.  Usa sa apektadong residente nga nagpaila nga si Manuel Badajos niingon nga nituman siya sa mando sa kagamhanan nga boluntaryong bungkagon ang gipuy-an nga naa kilid sa sapa nga nasulod sa three-meter easement sa syudad.

Tumong sa pagpahawan sa 23 ka balay sa barangay mao ang aron makasulod ang mga ekipo nga gamiton sa pag-desilt o pagtangtang sa nabara nga lapok ug basura sa kanal ug imburnal.

Kay mao kini ang nakitang hinungdan sa dali nga pagbaha sa syudad bisan pa man og dili kusog ang uwan.

Ang mga apektadong pamilya gipanghatagan og tag P20 mil apan si Badajos miingon nga kuwang kini.

Matud niya pito sila sa ilang pamilya ug wala pa sab sila masayod kung asa mobalhin tungod kay walay gihatag nga relocation site ang kagamhanan.

Si Badajos kinsa nagpuyo sa maong lugar sukad pa sa 2019, miingon nga naningkamot sab sila nga makapangita og abangan apan dili kapaigo ang ilang madawat sa abang tungod kay ang ilang panginabuhian mao ang pagluto ug pagbaligya og sud-an sa maong lugar.

“Wala na man sab gyud mi mahimo kay ang ilang buhaton kay kaayuhan ra man sab gyud sa tanan,” matud ni Badajos.

Nipasalig sab si Mayor Nestor Archival nga tabangan ang mga residente nga mapangitaan og relocation site.   IBM BANAT NEWS