Usa patay, usa samaran sa sunog

CEBU, Philippines — Usa ang namatay samtang usa usab ang naangol sa nahitabong sunog sa pipila ka mga balay sa Purok Kangkong, Barangay Gun-ob, Lapu-Lapu City, niadtong Miyerkules sa gabii, Nobiyembre 4.

Giila ang namatay nga si Charlito Collantes, 53,  usa ka person with disability (PWD).

Base sa report sa City Disaster Risk Reduction and Management Department (CDRRMD) alas 11:10 sa gabii, upat ka pamilya o mokabat sa 16 ka indibidwal ang naapektuhan sa sunog.

Sa upat ka mga balay, tulo ang hingpit nga nasunog samtang usa ang partially damaged. Tulo sa mga pamilya mga informal settlers samtang usa ang sharer lamang sa gipuy-ang balay. Si Lapu-Lapu City Mayor Ma. Cynthia “Cindi” King-Chan nipaabot sa iyang pahasubo sa pamilya sa namatay ug mipasalig nga motabang ang siyudad sa mga pamilyang naapektuhan aron makabangon gikan sa maong insidente.

Matud ni King-Chan, mohatag ang CDRRMD og init nga pagkaon ug food packs, lakip ang Cash-for-Work assistance alang sa mga apektadong residente.

“Kabalo kita nga lisod kaayo ang ilang kahimtang karon, ilabi na nga nawad-an sa ilang panimalay ug mga kabtangan. Atong gisiguro nga dili sila pasagdan ug mahatagan gyud sa ilang mga importanteng panginahanglanon,” matud sa mayor.

Nagsugod na usab ang City Social Welfare and Development Office (CSWDO), kauban ang mga opisyal sa Barangay Gun-ob, sa pag-assess sa kahimtang sa mga pamilya aron matino ang ilang mga panginahanglan ug mapadali ang paghatag sa pinansyal nga ayuda.

Temporaryong nagpuyo ang mga apektadong pamilya sa sa gym ibabaw sa bag-ong Gun-ob Barangay Hall.

Base sa report sa Lapu-Lapu City Fire District, nadawat sa Bureau of Fire Protection (BFP) ang alarm alas 9:01 sa gabii ug gideklarang fire out ang sunog alas 9:34 sa gabii, human sa 33 minutos nga pagpanglimbasog sa mga bomber, wala pa matino ang sinugdanan sa sunog.

Ikatulo na kini nga sunog sa maong siyudad karong bulan sa Nobiyembre, ug duna say nakalas ug nangaangol.

Sa inisyal nga report, siyam ka mga estruktura ang nasunog, nga gibanabanang mokabat sa P300,000 ang kantidad sa kadaot nga gibilin niini.

Kagahapong adlawa gihapon, niulbo ang sunog sa pipila ka mga balay sa bukirong bahin sa Sitio Nangka Ville, Brgy. Quiot Pardo, Cebu City, wala hinuoy natala nga nasakitan o nakalas sa maong hitabo. (BANAT NEWS)