Upat ka title fights sa "Fist of Fury XIII"

CEBU, Philippines — Upat ka title fights ang masaksihan sa "Fist of Fury XIII" sa Chao Sy International Promotions karong Nobyembre 14 sa Fuente Osmeña Circle sa dakbayan sa Sugbo.
Pormal nga gilusad ni boxing promoter Lorenzo "Chao" Sy ang maong kalihokan kauban sila Cebu City Sports Commission (CCSC) Chairman Dr. Rhoel Dejano ug CCSC Executive Director Rocky Alsoseba kagahapong adlawa sa La Fortuna-Sto. Niño branch.
"Free ni atong paboksing, mas maayo daghang tawo makatan-aw," matud ni Sy, kinsa mipatin-aw nga gusto niyang ipahigayon ang maong promosyon sa usa sa mga makasaysayanong dapit sa dakbayan.
Sa main event, si John Kevien Jimenez (10-5, 5 KOs) sa dakbayan sa Sugbo makigbinukbokay ni Carlo Diaz (9-4-1, 1 KO) sa Manila alang sa korona sa Philippine minimumweight division.
"Focus lang mi ani sa gameplan. Gusto lang gyud namo nga modaog ug makuha ang bakos," dason pa ni Jimenez. "Kompiyansa ko sa akong tsansa kay naghago mi sa training ug gipangandam namo og maayo kining awaya."
Sa laing mga sangka sa kampiyonato, si Junebirt Bantay (10-2, 2 KOs) sa dakbayan sa Mandaue mosakbang batok sa beteranong si Richie Mepranum (38-10-1, 12 KOs) sa General Santos City alang sa Asian Boxing Federation (ABF) featherweight title.
Samtang si Jemuel Arañas (9-4-1, 5 KOs) sa dakbayan sa Carcar makigbugno ni James Clarion (7-1-1, 4 KOs) sa Davao City alang sa Philippine Boxing Federation (PBF) Youth flyweight belt. Si matchmaker Edcel Mike Tuñacao nagkanayon nga mag-atbang ang usa ka Pinoy ug usa ka Hapon nga boksidor sa ikaupat nga engkwentro alang sa titulo nga ilang ipahibawo sa dili madugay.
Sa undercards, si Erich Binoya sa Omega Gym mohamag ni Jimmybie Cais sa dakbayan sa Sugbo, samtang si Robert Searles sa The Legend Gym makigpinaksitay ni Jerson Baclohan sa dakbayan sa Mandaue. Pipila usab ka amateur bouts ang giandam aron pagdugang og aksiyon ning makalingaw nga pasundayag.
- Latest















