518 ka violators sikop atol sa operasyon sa CPPO

CEBU, Philippines — Niabot ngadto sa 518 ka indibidwal ang nasikop sa nagkadaiyang bahin sa Lalawigan sa Sugbo tungod sa paglapas sa mga lokal nga ordinansa atol sa 343 ka operasyon sa Cebu Police Provincial Office (CPPO) ubos sa Safer Cities Initiative niadtong Nobiyembre 3, 2026.

Sa kinatibuk-ang gidaghanon, 333 ang gipamulta samtang 185 ang gipasidan-an ug gibuhian subay sa mga ordinansa sa tagsa-tagsa ka siyudad ug lungsod.

Nikabat ngadto sa P190,200 ang kinatibuk-ang nakolekta nga multa samtang walay natala nga gipasakaan og kaso.

Nag-una sa mga kalapasan ang paglapas sa mga traffic ordinance sa siyudad ug lungsod nga nikabat ngadto sa 333 ka indibidwal.

Lakip usab sa mga nasikop ang 86 ka tawo nga nag-inom og makahubog nga ilimnon diha sa pampublikong lugar, 42 ka menor de edad nga nakalapas sa curfew hours, 29 ka nanigarilyo diha sa pampublikong lugar ug 19 ka tawo nga naglatagaw nga walay sinina sa ibabaw nga bahin sa lawas.

Subay niini, siyam ka indibidwal ang nasikop tungod sa paggamit og karaoke lapas sa gitugot nga oras.

Giklaro sa CPPO nga kabahin kini sa ilang padayong paningkamot sa pagpatuman sa mga lokal nga ordinansa nga nagtumong sa pagpalambo sa kaluwasan sa kadalanan, kahapsay sa publiko ug disiplina sa komunidad.

Matud ni Police Colonel Abubakar Udang Mangelen, Jr., direktor sa CPPO nga importante ang makanunayon ug patas nga pagpatuman sa mga ordinansa aron mapalambo ang disiplina ug malikayan ang mga kalihokan nga mahimong hulga sa kaluwasan sa publiko.

Gipasalig usab ni Mangelen ang padayong pagsunod sa CPPO sa ilang ABCD Guide nga nagpasabot sa Abide by the Law, Build Public Trust, Commit to Integrity ug Deliver Results isip giya sa propesyonal ug matinud-anong pag-alagad sa publiko.

Giawhag usab sa CPPO ang mga residente nga motuman sa mga lokal nga ordinansa ug makigtambayayong sa kapolisan aron mapadayon ang kalinaw ug kahapsay sa tibuok Lalawigan sa Sugbo. (BANAT NEWS)