Winners sa Fitbod Cebu 2026

Titulo, gamiton  sa  pagsangyaw sa healthy lifestyle

Winners sa Fitbod Cebu 2026

Titulo, gamiton  sa pagsangyaw sa healthy lifestyle

Dili lang ang maayong pamorma  sa lawas ang gipunting sa  Fitbod Cebu 2026, kondili apil usab ang importansya sa pagmintinar sa  healthy lifestyle.

Mao kini ang mensahe nga gipatigbabaw   sa grand winners   sa Fitbod Cebu 2026 nga sila  Hanna Vi Agravante sa Cebu City ug Gerald Flores sa Naga City.

Sa press conference nga gipahigayon sa Waterfront Cebu City Hotel and Casino sa niaging adlaw, gibutyag sa mga mananaog  nga importante kaayo ang regular nga pag-ehersisyo, pagbaton og healthy lifestyle ug paghatag og pagtagad sa mental health.

Alang kanila, ang fitness dili lamang kutob sa pisikal nga panagway, kondili usa usab ka paagi aron mapalig-on ang lawas, ug mapalambo ang disiplina sa kaugalingon.

Gawas sa pagpakita sa ilang pisikal nga hitsura, gilauman usab nga gamiton sa mga mananaog ang ilang titulo ug impluwensya aron mapalapdan ang kahibalo sa publiko bahin sa kahimsog ug kaayohan sa kinabuhi.

Samtang gibutyag ni Danny Booc, founder sa Fitbod Cebu, nalipay siya nga nakahimo siya  og kompetisyon nga lahi sa naandan nga mga pageant tungod kay nagpunting kini sa fitness ug mga adbokasiya nga makatabang sa katawhan.

Dugang pa niya, positibo ang mga reaksyon sa publiko sa unang edisyon sa kompetisyon ug daghan na usab ang nisugyot nga ipadayon kini pinaagi sa ikaduhang edisyon sa sunod tuig. Suma pa  ni Danny, hisgotan pa nila kini sa hustong panahon tungod kay daghan pa og responsibilidad ang kasamtangang winners partikular na sa pagsabwag sa ilang mga adbokasiya.

Ang uban nga mga mananaog sa nagkalain-laing kategoriya kay sila  Prince Abelgas( Cebu City)  ug Freelyn Flores( Mandaue City) alang sa Fitbod Elite; Samryl Fernandez (Bacolod City )ug  Karen Rivero (Leyte)alang sa Fitbod Prime; ug Revie Lacorte( Cebu City) ug Janice Schlaucher ( Talisay City) alang sa Fitbod Classic.

Ang mga  first runner- up kay sila  Jeuse Panganiban( Compostela ) ug Schlaucher (Talisay City), samtang ang mga second runner- up kay  sila Gabriel Reyes ( Siargao ) ug Berry Tanya Bandal ( Northern Samar). Dili usab ikalimod sa mga mananaog nga mingawon sila sa ilang mga kauban nga contestants  nga ilang giisip nga sama na sa pamilya.

Tungod sa dugay nilang panahon nga nag-uban panahon sa preparasyon ug kompetisyon, nakatukod sila og suod nga panaghigalaay nga dili basta-basta malimtan.