Andam na sa kalag-kalag

CEBU, Philippines — Kapin sa 1,000 ka pulis, 553 ka kawani sa kagamhanang dakbayan ug 80 ka bombero ang ipakatap sa nagkadaiyang sam-ang ug lugar sa dakbayan sa Sugbo aron pagsiguro sa kalinaw ug kahapsay atol sa pagsaulog sa Adlaw sa mga Santos ug sa Kalag-Kalag 2026 sa Nobyembre 1 ug 2.

Gipahigayon na sa Cebu City Police Office (CCPO) ang send-off ceremony alang sa mga personnel niadtong Miyerkules, Oktubre 28, isip pagpangandam sa Oplan Undas 2026 ug sa gipaabot nga pagdagsa sa mga tawo sa mga sam-ang, memorial parks, simbahan ug uban pang lugar nga tapukanan sa mga tawo.

Ang Cebu City adunay 21 ka sam-ang nga padad-an og mga polis aron mobantay inabagan sa uban pang force multipliers.

Gilauman nga makompleto ang deployment sa tanang sam-ang karong adlawa. Oktubre 31 ug magpadayon hangtud Nobiyembre 3 aron maapil ang mga mobisita sa ilang mga minahal nga namatay human sa duha ka adlaw nga pagsaulog.

Gihimug-atan ni CCPO Acting City Director Police Colonel Ricky  Sumalde ang importansya sa police visibility ug dali nga pagtubag sa alarma.

Gipahinumdoman usab ni Sumalde ang mga personnel nga magpakita og disiplina, propesyonalismo, pagpailob ug matinahurong panerbisyo, lakip ang pagtahod sa tawhanong katungod sa katawhan.

Mokabat sa 553 ka personnel gikan sa nagkadaiyang departamento ug operational units sa city government ang motabang sa pagdumala sa trapiko, pagpatuman sa mga regulasyon, road clearing ug uban pang buluhaton alang sa kalag-kalag.

Sa maong ihap, 197 ang i-assign sa traffic field posts, 109 ang detailed personnel ug 134 ang office personnel. Aduna usab 25 ka engineering personnel, 18 alang sa mobile patrol, 13 sa Task Force Traders, 12 sa Communication Section, 11 sa Task Force MCH/Trisikad ug 10 ka deputized personnel gikan sa Land Transportation Office (LTO).

Dunay pito ka sakop sa Eagle's Eye, unom sa towing, upat ka sweepers, tulo alang sa clamping ug upat gikan sa Special Task Action Section ug 80 ka sakop ang ipakatap sa Bureau of Fire Protection (BFP) sa Cebu City.

Gilusad usab ang Oplan Harabas sa Cebu South Bus Terminal (CSBT) aron masiguro ang kaluwasan sa mga pasahero nga mobiyahe.

Ang sa CSBT management, Philippine Drug Enforcement Agency (PDEA) ug Land Transportation Office sa Central Visayas (LTO-7) nagpahigayon og surprise drug test diin duna gyuy mga drayber nga napositibo sa drugas.

Giawhag usab sa mga otoridad ang publiko nga magmatngon, mosunod sa mga pahimangno sa kaluwasan ug mokooperar sa mga otoridad para sa malinawon ug hapsay nga Kalag-Kalag 2026.—  IBM BANAT NEWS