Letran Knights tinusok ‘twice-to-beat’ bonus sa quarters
MANILA, Philippines — Tinuhog ng Letran ang Arellano University, 91-77, upang sikwatin ang top spot sa Group B at ‘twice-to-beat’ bonus sa quarterfinals ng NCAA Season 102 men’s basketball tournament kahapon sa Playtime FilOil sa San Juan City.
Tumikada si John Estrada ng 25 points, tatlong assists at tatlong steals para ilista ang 8-3 karta ng Knights.
Maagang ipinaramdam ng Letran ng kanilang lakas matapos hawakan ang six-point lead, 25-19, sa first quarter.
Nanatili ang mainit na laro ng Knights sa second period at tinambakan ang Chiefs sa halftime, 58-35.
Hindi na binigyan ng pagkakataon ng Letran ang Arellano na makahabol sa second half upang siluhin ang panalo.
Sa unang laro, kumamada si Fil-Canadian Daniel Marcelo ng 16 points para tulungan ang nagdedepensang San Beda sa 61-57 paggupo sa Mapua.
Ang rookie guard ang sinandigan ng Red Lions para makahabol at makuha ang pang-walong panalo sa 11 laro.
Nasalap ng Cardinals ang pang-limang talo sa 11 salang.
Kinuha ng Mapua ang 30-23 halftime lead bago bumida si Marcelo sa third period para ibigay sa San Beda ang 45-36 kalamangan.
Hindi na napigilan ng Cardinals ang ratsada ng Red Lions sa final canto.
- Latest
