Kahera, 3 pa inaresto sa pagnanakaw

MANILA, Philippines — Inaresto ng pulisya ang apat katao kabilang ang kahera ng isang kilalang convenience store kaugnay sa pagnanakaw ng mga kahon ng alak at iba’t ibang brands ng mga ream ng sigarilyo gamit ang pekeng resibo sa Brgy. Putatan, Muntinlupa City, noong Martes.

Ang mga suspek ay kinabibilangan ng 37-anyos na kahera, 1 em­pleyado ng convenience store, na sinampahan ng reklamong qualified theft; 24 at 32 anyos na tricycle drivers, at isang 24-anyos na pinagbagsakan ng nakaw na paninda.

Sa ulat, inaresto ng pulisya ang mga suspek sa reklamong idinulog ng may-ari ng grocery ang insidente nang matukoy ang discrepancy at pekeng resibo na inisyu ng kahera.

Sa isinagawang surveillance ng pulisya, nang isasakay na sa tricycle ang mga pinamili ay hinarang na sila at ­inaresto, pati ang kasabwat na cashier.

Umamin umano ang mga driver na nadeliber na ang naunang mga produkto sa Alabang.

Nasa kabuuang 15 kahon ng alak, iba’t ibang ream ng sigarilyo ang narekober na umaabot sa P134,744 at kinum­piska rin ang sangkot na mga sasakyan.