SMB, GSM agawan sa 1-0 lead
MANILA, Philippines — Agawan ng tagay ang San Miguel at Barangay Ginebra, habang magbibinyagan din ang Rain or Shine at Converge sa Game One ng PBA Season 50 Governors’ Cup best-of-five crossover quarterfinals sa Smart Araneta Coliseum.
Unang sasabak ang Group B No. 2 seed Elasto Painters at Group A No. 3 seed FiberXers ngayong alas-5:15 ng hapon bago ang sagupaan ng sibling rivals na Beermen, segunda sa Group A, at Gin Kings, tersera sa Group B, sa alas-7:30 ng gabi.
Nauna nang nakaiskor ng panalo ang reigning champion TNT Tropang 5G (Group A No. 4) kontra sa Magnolia (Group B No. 1), 92-70, tampok ang series winner kontra sa mananalo sa pagitan ng Ginebra-SMB.
Nasa kabilang bracket ang Group A top seed NLEX na nakaiskor ng dikit na 97-92 panalo kontra sa Group B 4th seed Phoenix.
Sinumang magwagi sa race-to-three series ay haharapin ang mananalo sa pagitan ng RoS at Converge.
Sa unang pagkakataon ay hindi si Justin Brownlee ang masasandalang alas ng Ginebra sa playoffs matapos makasama ang resident import at Gilas Pilipinas naturalized player sa paghahari sa Commissioner’s Cup nitong taon.
May iniindang leg injuries at problema sa puso si Brownlee kaya hindi nakabalik sa Governors’ Cup tampok si Jordan Murphy na siyang aasahan ni head coach Tim Cone.
Nakahabol sa playoffs ang Ginebra sa kabila ng maalat na 2-4 simula sa likod ng tatlong panalo sa huling apat na laro sa pamumumuno ni Murphy.
Subalit hindi magiging basta-basta ang kanyang kaharap sa katauhan ni George King ng Berrmen na mano-mano ang laban kontra kay Deone Burton ng NLEX para sa Best Import award.
- Latest
