Imbestigasyon bahin sa bukog sa tawo gipalawman

CEBU, Philippines — Dili lang kay usa ka tawo ang posibleng nalambigit sa krimen  may kalabotan sa pagkakaplag sa patay nga lawas nga gilubong sa usa ka bakanteng luna duol sa Cebu City Medical Center sa Barangay Pahina-Central niadtong Lunes sa hapon.

Base kini sa pasiunanang impormasyon gikan sa padayong imbestigasyon sa Cebu City Police Office (CCPO) mahitungod sa maong bukog sa tawo nga nakuykoyan sa lugar.

Matud ni PLt. Col. Gerard Ace Pelare, Deputy City Director for Operations sa CCPO, naa na sa hustong direksyon ang imbestigasyon sa maong kaso.

Aduna na usab silay mga persons of interest, samtang positibo nang giila sa pamilya ang biktima.  Ang biktima giila nga si Isaac Viernes, kansang pamilya kapin duh aka semana nang nangita sa iyaha human siya wala na niuli sugod pa atong Oktobre 7 nga namista sa maong barangay.

Gihangyo ni Pelare ang publiko nga hatagan og igong panahon ang kapolisan aron mapalawman pa ang imbestigasyon.

Aron matino kun si kinsa ang mga nalambigit ug masiguro nga mapanubag ang mga responsable sa maong krimen.

Padayon ang pagpangutana sa kapolisan aron makab-ot ang hustisya alang sa biktima.

Gitabonan og semento ug uling ang lawas sa usa ka lalaki nga taga-Basak Pardo, Cebu City, human kini gilubong ilalom sa kanal nga agianan sa tubig, sumala sa nadiskobrehan sa mga awtoridad.

Matud ni Cebu City Councilor Dave Tumulak, nakadawat ang inahan sa biktima og impormasyon nga posibleng anaa sa maong lugar ang iyang anak maong ilaha kining gisubay.

Human makumpirma nga adunay langsi kaayong baho gikan sa maong dapit, gikontak ang Cebu City Disaster Risk Reduction and Management Office (CCDRRMO) aron susihon ug bungkalon ang lugar.

Sa pagkubkob, nakit-an ang lawas nga gitabonan og uling ug gimasahan og semento aron matago ang nahitabo.

Narekober usab ang  sako nga gisudlan sa uling, semento, balas ug graba. Nakaplagan usab ang mga bukog sa ilalom sa kanal, diin gituohang gibutang ang lawas sa biktima sa wala pa kini gitabonan og semento. Base sa gisulti ni Tumulak, adunay samad sa ulo ang biktima nga posibleng resulta sa pagpamusil.

Nagtuo ang otoridad nga dili  lang ka usa ka tawo ang naghimo sa krimen.—  IBM BANAT NEWS