Siyudad sa Mandaue nangandam sa El Niño

CEBU, Philippines — Giaprobahan sa Mandaue City Council kagahapon, Oktubre 5, 2026, ang duha ka resolusyon nga nagtumong sa pag-andam sa siyudad sa posibleng dugay nga hulaw, grabeng kainit ug kakulang sa tubig tungod sa El Niño phenomenon.

Ang duha ka resolusyon gisulat ni Councilor Carlo Fortuna ug nagtutok sa pagpalig-on sa disaster preparedness pinaagi sa dugang nga pondo, water security measures, health protocols ug koordinasyon tali sa mga city department ug barangay. Ang unang resolusyon nanawagan sa City Disaster Risk Reduction and Management Office (CDRRMO), City Health Office (CHO) ug ubang hingtungdan nga opisina sa city government nga mopatuman og komprehensibong El Niño action plan.

Girekomendar usab niini ang pagdugang sa Local Disaster Risk Reduction and Management Fund (LDRRMF), o paggamit sa available nga wala pa ma-appropriated nga surplus funds, aron makapalit og emergency water containers, stationary water tanks ug uban pang suplay alang sa mga komunidad nga mas delikado sa epekto sa El Niño. Gitawag usab sa resolusyon ang City Engineering Office ug CDRRMO nga makigkoordinar sa Metropolitan Cebu Water District (MCWD) ug lokal nga mga water supplier alang sa alternatibong tinubdan sa tubi, pagbutang og water tanks ug paghimo og klaro ug regular nga iskedyul sa water rationing alang sa mga komunidad nga nanginahanglan.

Samtang, ang ikaduhang resolusyon nanawagan sa pagtukod og multisectoral El Niño Task Force nga pangulohan sa local chief executive, nga adunay lahi nga branches alang sa water security ug public health and safety.

Gitawag usab sa resolusyon ang mga city department nga manglimpyo sa drainage systems, magtukod og gagmay nga rainwater-impounding facilities, mag-rehabilitate sa community artesian wells alang sa non-potable use ug magdasig sa water recycling sa mga commercial, industrial ug construction establishments. Lakip sa mga gisugyot nga lakang batok sa grabeng kainit mao ang pag-adjust sa iskedyul sa klase ug outdoor work aron malikayan ang peak heat hours. (BANAT NEWS)