P5.19 milyong ‘hot meat’ nasabat; 2 Chinese tiklo

MANILA, Philippines — Tinatayang P5.19 milyon ng “hot meat” o undocumented imported meat products ang nasamsam sa isinagawang operasyon sa Pasay City.

Ayon sa Department of Agriculture (DA) nitong Lunes, ikinasa ng ahensiya at National Bureau of Investigation (NBI) ang enforcement operation sa isang property sa C.A. Lucban St., noong Setyembre 22 at 23.

Nakumpiska ang 11.5 metriko toneladang hot meat, kabilang ang pecking duck, whole pigeon, lamb, yellow chicken, black chicken at iba pang frozen meat products na kung saan ay dalawang Chinese national ang naaresto at isinailalim sa inquest proceedings.

Ayon sa mga otoridad, hindi ­accredited ng DA-National Meat Inspection Service (NMIS) at hindi rin rehistrado bilang meat cold-storage warehouse o depot ang mga establisyimentong pinagkuhanan ng mga produkto.

Kinasuhan ang mga suspek dahil sa umano’y paglabag sa Meat ­Inspection Code of the Philippines na nagbabawal sa pagbebenta, pagbiyahe o pamamahagi ng karne na hindi dumaan sa kinakailangang inspeksyon.

Inilipat ang mga nakumpiskang produkto sa isang NMIS-accredited cold storage facility sa Meycauayan habang hinihintay ang utos ng korte. Ang mga mapapatunayang hindi ligtas kainin ay itatapon naman alinsunod sa mga regulasyon.