Vice ug Rico, nakadawat og rekognasyon

Nakadawat og rekognasyon sa Asian Academy Creative Awards (AACA) sila Vice Ganda, Nadine Lustre ug Rico Hizon.

Si Vice maoy nakadaog isip Best Actor sa Pilipinas tungod sa iyang maayong pagdala sa pelikulang Call Me Mother, samtang si Rico usab ang napili isip Best Entertainment Host gikan sa Pilipinas alang sa iyang Rated R: The Rico Hizon Podcast. Lakip usab sa nakalusot sa grand final alang sa Best Actress mao si Nadine Lustre tungod sa iyang paglugwa sa Viu series nga Love, Siargao.

Giila usab isip Best Adaptation of an Existing Format sa Pilipinas ang It’s Okay to Not Be Okay, samtang si Onat Diaz kay giila alang sa iyang pagdirek sa The Silent Noise. Ang The Silent Noise kay nakadawat usab og pag-ila isip Best Drama sa Pilipinas.

Suma pa sa Asian Academy Creative Awards, ang national winners maoy morepresentar sa ilang tagsa-tagsa ka nasud ug teritoryo sa Grand Awards Gala nga mahitabo karong Disyembre 3, 2026, sa Capitol Theatre sa Singapore.