Konseho sa Dakbayan sa Sugbo nangayo og detalyadong report
CEBU, Philippines — Taliwala sa wala pa masulbad nga krisis sa basura sa Dakbayan sa Sugbo, gipangayo sa konseho sa siyudad ang detalyadong report sa nagkadako nga gasto sa siyudad sa paglabay sa basura samtang usa ka lokal nga engineering firm ang pormal nga nitanyag nga mag-instolar og high-capacity solid waste management system.
Sa ulahing session, si Konsehal Harold Kentdrick Go niduso og resolusyon nga nagmando sa executive department sa pagsumite og Comprehensive Solid Waste Financial and Operational Sustainability Report sulod sa 15 ka adlaw.
Ang maong lakang nagmando sa Department of Public Services, City Budget Office, City Treasurer’s Office, Bids and Awards Committee, City Accounting Office, ug uban pa’ng mga ahensiya sa detalyadong appropriations, mga obligasyon, procurement history, equipment condition ug projected requirements.
Gipasabot ni Go nga ang siyudad nigasto kini tunga-tunga sa P4.2 milyones ug P4.5 milyones sa matag adlaw nga hauling sa basura ngadto sa Lungsod sa Aloguinsan human nahugno ang Binaliw landfill.
Ug sa maong sitwasyon, si Go nipasidaan nga posibleng mahubas niini ang pundo nga alang unta sa healthcare, flood-control, edukasyon, ug ubang mga mahinungdanong serbisyo.
Ang resolusyon nagkinahanglan og komprehensibong taho sa kasamtangang alokasyon sa pundo ug kahimtang niini, actual nga gasto sa operasyon, projected financial requirements, procurement history, alternatibong mga pasilidad sa paglabay sa basura, kahimtang sa rehabilitasyon sa Binaliw, performance sa lebel sa barangay, kondisyon sa mga ekipo ug sakyanan, kasamtangang liabilities ug ang gisugyot nga budget alang sa solid waste management sa tuig 2027. Imandato usab ang five-year sustainability projection, risk assessment ug comparative cost matrix sa disposal options.
Sayo pa, si Go niduso kini og lakang nga nag-awhag alang sa short-team management plan alang sa nahibilin sa tuig 2026 ug long-term plan diin iyang gitumbok ang mga reklamo kabahin sa mga wala nakolektang basura, baho ug risgo sa panglawas.
Gisaway ni Go ang executive department tungod sa dili maayong komunikasyon nga nag-ingon nga ang mga konsehal kanunay nga nakakat-on sa operational changes gikan sa mga kapitan sa barangay o mga taho sa media imbes nga direkta gikan sa opisyales sa siyudad.
Sa laing bahin, ang Suki Trading Corporation nisumite og letter intent ngadto kang Mayor Nestor Archival diin nitanyag kini nga mo supply, deliver, instolar, test ug mo commission sa ilang Advanced Waste Solution with Environmental Pollution Control Device 500 (AWS-EPCD500) ug Automatic Mechanical Garbage Segregation Machine.
Giingong ang AWS-EPCD500 gidisenyo aron himuong abo ang mga nahibilin nga basura ug gikontrolar ang makadaot nga emissions, samtang ang makina sa pag-segregate mechanically mobuwag sa recyclables, organics ug residuals.
Ang package naglakip sa pollution control devices, accessory equipment ug steel shed sa pag-house sa pasilidad nga gisaad sa kompaniya nga idonar inig mahuman kini.
Ang Suki Trading nikomitar kini sa paghatag og training ngadto sa mga personnel sa siyudad sa pagsiguro sa technology transfer. (Gikan sa The Freeman/BDB) BANAT NEWS
- Latest















