Yulo sinikwat unang ginto ng Pilipinas sa Asian Games

MANILA, Philippines — Matapos ang ilang araw na paghihintay, nakamit na rin ng Pilipinas ang kauna-unahang gintong medalya sa 20th Asian Games sa Aichi-Nagoya, Japan.

Umiskor si top gymnast Carlos Edriel Yulo ng 14.666 points sa finals ng men’s floor exercise ng men’s artistic gymnastics event para angkinin ang gold medal kahapon sa Nippon Gaishi Hall Rainbow Hall.

Ito rin ang unang gymnastics gold ng bansa sa ilang taong pagsali sa Asiad.

Tinalo ng 26-anyos na si Yulo sina silver meda­list Karim Milad (14.600) ng Kazakhstan at bronze medal winner Tsukiyama Shoma (14.566) ng host Japan.

“Ibinigay ko iyong best ko and iyon ang kinalabasan ngayon. I’m just real­ly grateful to God,” wika ni Yulo na tatarget pa ng ginto sa finals ng vault at parallel bars ngayong hapon.

Pumuwesto ang 18-anyos niyang utol na si Karl Eldrew sa seventh place sa naitalang 12.233 sa kanyang Asian Games debut.

Ang gold ni Yulo ang dumagdag sa naunang silver ni mixed martial arts expert Jean Claude Saclag at apat na bronzes nina MMA fighter Carlos Alvarez, karateka Marie June Adriano, women’s karate team at women’s soft tennis team para itaas ang Pilipinas sa No. 20 spot sa Asiad medal tally sa hanay ng 45 bansa.

Sa 3x3 basketball, parehong nagmartsa sa semis ang Gilas Pilipinas Men at Women teams matapos daigin ang Chinese Taipei, 21-19, at Singapore, 22-12, sa quarterfinals, ayon sa pagkakasunod.

Sa women’s 5x5 basketball, nadiskaril ang pagsampa ng Gilas Pilipinas Women sa semis nang matalo sa Chinese Taipei, 71-83, sa quarterfinals.

Sa women’s football, hahamunin ng Philippine women’s football team ang defending champion Japan sa kanilang quarterfinals duel ngayong alas-630 ng gabi.

Sa swimming, minalas si Fil-Canadian Kayla Sanchez na makalangoy ng bronze medal nang tumatapos sa fourth place sa women’s 50-meter freestyle sa isinumiteng 24.75 segundo.

Sa women’s skateboarding, umabante si Mazel Paris Alegado sa finals ng park skateboarding event sa pagiging 4th-places sa kanyang 73.93 points sa preliminary, habang laglag si ninth-placer Elizabeth Amador.

Pasok naman sa men’s park finals si Jericho Francisco.

Sa rowing, hindi naka-podium si Paris Olympics campaigner Joanie Delgaco nang magtapos sa sixth place sa women’s single sculls Final A sa kanyang oras na 8:01.63.

Sa men’s bo­xing, sibak si Norlan Petecio sa men’s 70kg division nang sumuko kay Japanese Sewonrets Okazawa, 5-0, sa Round of 32.

Sa fencing, talsik sina Noelito Jose, Jr. Miguel Bautista at Queen Denise Dalmacio sa kanilang mga laban sa individual epée event.