Transboundary haze posibleng magpadayon sa Central Visayas

CEBU, Philippines — Posibleng magpadayon ang transboundary haze sa Central Visayas samtang nagpadayon ang sunog sa Indonesia ug hanging habagat nga mahimong magdala sa mga pollutant ngadto sa rehiyon, matud sa DENR-Environmental Management Bureau Region (EMB)-7.

Kagahapon, si Engineer Arthur Niño Calupig, air quality monitoring expert sa EMB-7 nagkanayon nga posibleng mosaka pag-usab ang lebel sa PM2.5 kong magpadayon ang mga sunog sa Indonesia ug habagat.

Sa alas 11:00 sa buntag kagahapon, ang PM2.5 nga nagrepresentar sa Metro Cebu niabot sa 189 o very unhealthy samtang 101 o “unhealthy for sensitive groups” ang sa Dakbayan sa Toledo.

Bisan nikunhod kini gikan sa “acutely unhealthy” nga lebel gitumbok ni Calupig nga dili kini pasabot nga luwas na ang hangin.

Sa Dakbayan sa Toledo, ang pinakataas nga 24-hour rolling average sa PM2.5 nga niabot sa 88.4 micrograms per normal cubic meter sa ala 1:00 sa kadlawon niadtong Domingo, tukma sa AQI nga 296 o “acutely unhealthy”, ang luwas nga 24-hour PM2.5 level mao ang 35 micrograms per normal cubic meter.

Matud ni Calupig nga ang 24-hour rolling average maoy basehan sa public AQI advisory samtang ang hourly readings gigamit sa pagtino kong kanos-a moabot sa peak ang PM2.5.

Gikan sa Septiyembre 18 hangtud sa 20, 2026 nisaka pag-ayo ang PM2.5 samtang dominante ang hanging habagat.

Gikataho nga hinay usab ang dagan sa hangin nga anaa lang sa 0.5 ug 2.1 metros kada segundo nga nakapahinay sa pagkatag sa pollutants ug nakatabang sa ilang pagtapok sa atmosphere.

Gipadayag ni Calupig nga dili lang Cebu ang naapektohan gumikan kay nakasinati usab og PM2.5 levels ang pipila ka lugar sa Mindanao niadtong Septiyembre 18 hangtud sa 20.

Ang ulan mahimong makatabang sa pagpaubos sa PM2.5 sa mosunod nga mga adlaw apan mahimong temporaryo lang ang pag-ayo depende sa panahon, direksiyon sa hangin ug pagpadayon sa sunog sa Indonesia. (BANAT NEWS)