Pag-aprobar sa pagtukod og condo, subdivisions ipasuspenso

CEBU, Philippines — Gisugyot ni Konsehal Alvin Arcilla ang temporaryong pagsuspenso sa pagdawat ug pag-apruba sa mga aplikasyon alang sa bag-ong condominium, subdivision, ug uban pang high-density residential development projects sa amihanang distrito ug bukirang bahin sa Dakbayan sa Sugbo.

Nipalabang og resolusyon si Arcilla nga unanimously approved sa konseho niadtong Septiyembre 15, 2026.

Kini tungod sa nagkagrabeng problema sa suplay sa tubig ug kahuot sa trapik sa mga lugar gikan sa Barangay Talamban padulong sa mga bukirang barangay.

Suma pa sa resolusyon, padayon nga nakasinati og kakuwang sa tubig ang maong mga lugar samtang nagkadaghan ang condominium, subdivision ug uban pang kalambuan. Gipasabot nga ang dugang nga mga proyekto mahimong mosangpot sa mas dako nga panginahanglan sa kasamtangang water supply system ug uban pang pampubliko nga imprastraktura.

Dugang pa ni Arcilla nga gikinahanglan una nga masiguro ang igo nga suplay sa tubig alang sa kasamtangang mga panimalay ug residente sa dili pa tugotan ang dugang dagkong kalambuan nga makadugang sa panginahanglan sa tubig.

Apil usab sa gikabalak-an ang kahuot sa dagan sa trapiko sa mga importanteng dalan nga nagsilbi sa Talamban ug bukid. Tungod niini, gisugyot ni Arcilla nga temporaryong suspendihon ang acceptance ug/o approval sa mga aplikasyon alang sa bag-ong condominium, subdivision ug susamang high-density residential projects sa apektadong mga lugar.

Ang suspenso magpadayon samtang gihuwat ang igo nga mga lakang aron matubag ang problema sa suplay sa tubig lakip na ang mga lakang sa Metropolitan Cebu Water District (MCWD) ingon man ang pagpatuman sa angay nga mass transportation ug traffic decongestion measures.

Gihangyo sa resolusyon ang Cebu City Planning and Development Office (CPDO), Business Permit and Licensing Office (BPLO), Office of the Building Official (OBO) ug uban pang ahensya nga ipatuman ang maong temporaryong pagsuspenso. — /MEL (BANAT NEWS)