P1.2 milyong gibiling danyos sa sunog sa Mambaling

CEBU, Philippines —  Gibanabanang mokabat sa P1.2 milyon ang gibiling damage sa sunog nga miigo sa residential area sa Sitio Lawis, Barangay Alaska Mambaling, Cebu City niadtong Biyernes sa hapon, Septiyembre 18, 2026.

Base sa inisyal nga assessment, 101 ka pamilya o 375 ka indibidwal ang naapektuhan sa maong sunog.

Mokabat usab sa 58 ka balay ang naapektuhan, diin 52 ang totally damaged samtang unom ang partially damaged.

Ang mga apektadong residente gidala sa Viking Gym nga gitakdang evacuation site, diin gipadayon sa Cebu City Government ang registration ug profiling sa mga naapektuhan alang sa pagproseso sa mga kinahanglan nilang ayuda.

Girekomendar sad nga pahatagan sila og pinansyal nga tabang ug relief assistance, lakip ang housing materials, bugas ug uban pang panginahanglanon.

Sumala sa Cebu City Fire Station, nadawat ang report sa sunog alas 3:26 sa hapon ug miabot ang unang fire engine sa lugar alas 3:32 sa hapon, lima ka minutos human kini mibiya sa estasyon. Gisaka sa first alarm ang insidente alas 3:32 sa hapon ug nakontrolar alas 4:34 ug hingpit nga napalong alas 5:30 sa hapon. Duha ka tawo ang naangol, apan walay namatay sa maong sunog.

Padayon pa ang imbestigasyon aron matino ang hinungdan ug mga sirkumstansya sa pagkasunog.