Cebu archbishop nilusad sa ‘I Choose God’ Movement

CEBU, Philippines — Gilusad ni Cebu Archbishop Alberto Uy ang “I Choose God” Movement isip kabahin sa padayong Synodal Journey sa Archdiocese of Cebu, nga nagtumong sa padayong pag-umol sa konsensiya sa mga magtutuo lapas sa panahon sa eleksiyon.

Matud ni Uy, dili lamang kini usa ka kalihokan sa Simbahan apan usa ka “way of life” nga nag-awhag sa mga tawo sa pagpili sa pagkamatinud-anon, pagsalikway sa korapsyon ug vote-buying, pagpanalipod sa kabus ug dignidad sa tawo, pag-atiman sa kinaiyahan, ug pagbarog alang sa kamatuoran ug kaayohan sa tanan.

Gipadayag ni Uy nga ang pag-umol sa konsensiya dili angay mahitabo lamang panahon sa eleksiyon.

“Our task is not to tell our people whom to vote for. Our task is something deeper,” matud niya, samtang iyang gihangyo ang mga pari nga mahimong magtutudlo sa mga mithi sa Ebanghelyo ug dili mahimong partisan.

Apil sa kampanya ang nagkadaiyang ministries sa Archdiocese sama sa Basic Ecclesial Communities, Youth Ministry, Cebu Caritas, CADComM ug Dilaab, nga magtinabangay sa mga programa alang sa mga parokya, pamilya, komunidad ug kabatan-onan.

Samtang, gihangop ni COMELEC-7 Regional Director Atty. Francisco Pobe ang kampanya sa Archdiocese of Cebu, nga nag-awhag sa mga botante nga gamiton ang ilang konsensiya sa pagpili sa mga lider.

Matud ni Pobe, ang partisipasyon sa religious sector makatampo sa public awareness ug voter education, ilabina sa pagpasiugda nga ang eleksiyon dili lamang sosyal ug politikal nga kalihokan kondili adunay moral nga dimensiyon. (BANAT NEWS)