Makasaysayanong boksing sa Bohol ipahigayon sa PMI     

CEBU, Philippines — Usa ka kasaysayan ang nag-atang sa mga Bol-anon sa dihang ang PMI Bohol Boxing Promotions mopahigayon sa labing dako nga kalihukan sa boksing sa ilang lapyahan.

Usa ka world title eliminator ug tulo ka rehiyonal nga kampiyonato ang masaksihan sa seguradong ekplsibong "Kumong Bol-anon XXVI" nga gikatakda karong Septiembre 12 sa Bohol Wisdom School (BWS) Gymnasium sa dakbayan sa  Tagbilaran.

Sa main event sa upat ka nasud nga pasundayag, ang garbo sa Bohol nga si Regie “Filipino Phenom” Suganob (18-1, 7KOs) moasdang sa usa ka dumot nga rematch uban ni kanhi two-time world champion Sivenathi “Special One” Nontshinga (14-2, 11KOs) sa South Africa sa usa ka 12 ka hughna nga International Boxing Federation (IBF) light flyweight elimination bout.

Si PMI Boxing CEO Atty. Floriezyl Echavez Podot nagkanayon nga mismo si IBF President Daryl Peoples ang motikang sa Bohol aron personal nga i-supervise ang lagmit maoy labing dako nga promosyon sa nasud ning tuiga.

Ang modaog sa Suganob-Nontshinga II makaangkon og katungod nga mohagit ni IBF light flyweight champion Thanongsak Simsri (40-1, 35KOs) sa Thailand.

"I hope the Boholanos will come out in full force and support our hometown pride (Suganob) in his bid to earn another world title shot," matud pa ni Podot.

Sa dili pa magbugno sila si Suganob ug Nontshinga, si one-time world title challenger Reymart “Cebuano Assassin” Tagacanao (13-1, 11KOs) sa siyudad sa Carcar makigbinukbokay sa bisitang Tsinoy nga si Chinlin Kuwang (5-1, 2KOs) alang sa IBF Asia junior bantamweight belt.

Ang way pilding si Leonard "The Dreamer" Pores III (11-0, 7KOs) sa Claveria, Misamis Oriental mopakita sab og aksiyon batok ni Andika Fredrikson “D' Golden Boy” Ha'e (21-3-2, 11KOs) alang sa korona sa IBF Pan Pacific flyweight division.

Samtang ang wala pa say pilding si Datu Adam (7-0, 5KOs) sa Camiguin makirharong ni Oky Akbar (12-4, 5KOs) sa Indonesia alang sa IBF Asia junior featherweight title.