Away nilang Fury ug Joshua dili madayon

CEBU, Philippines — Si Tyson Fury nangangkon nga si Anthony Joshua miatras sa gipaabot unta nga binukbokay tali sa duha ka Briton nga mga heavyweight boxers.

Ang kampo nilang Fury ug Joshua dugay nang nag-negosasyon alang sa higanteng sangka apan ang nabantog nga “Gypsy King” daw sa nawad-an na og pasensiya tungod sa kawalay kumpirmasyon sa away.  Gipikhan pa gani ni Fury si Joshua nga iyang ginganlan og talawan.

Gilauman nga mag-engkwentro ang  duha ka kanhi heavyweight world champion sa Nobyembre, apan wala pa gihapon makadesisyon kung asa ipahigayon ang maong away.

Sa usa ka eksplosibong bidyo nga iyang gi-post sa Instagram, gipadayag sa 38-anyos nga si Fury nga mikakak si Joshua sa ilang away.

Nagkanayon si Fury nga kon dili madayon ang bugno nila ni Joshua, ang  sunod niyang tumong mao ang ikatulong panagbangga nila ni Oleksander Usyk.

Si Fury kaduha na gipildi ni Usyk, nga duha ka higayon naghari isip undisputed heavyweight champion.

Ang Madison Square Garden sa New York maoy gilauman sa kadaghanan nga mahimong binyu sa giluto nga pinaksitay nilang Fury ug Joshu, bisan pa og mas gusto sa kampo ni Joshua ang Wembley Stadium sa London.

Gituohan nga ang Sela, ang promotional company nga gipanag-iya sa gobyerno sa Saudi Arabia nga nagpondo sa maong away, ug ang broadcaster nga Netflix, pabor sa pag-host sa maong promosyon didto sa Amerika.