Nagpakiluoy, gi-salvage gihapon

CEBU, Philippines — Patay nga lawas nga nakit-an kalibonan sa Barangay Sudlon 1 sa Cebu City atong adlaw nga Huwebes, nailhan na sa kapolisan.

Ang biktima giila nga si Leo Leaño ,57-anyos nga lalaki nga giingong gidagit samtang padulong sa sabungan sa Consolacion niadtong Huwebes sa hapon, Septembre 3, 2026.

Giila sa kapulisan alas-10 sa buntag niadtong Huwebes mao ang kataposang higayon nga nakita sa anak nga buhi siya sa dihang migikan kini sa ilang balay aron motan-aw og sabong sa silingang barangay.

Sa CCTV footage makita si Leaño nga nagsakay sa iyang motorsiklo ug mihunong sa daplin sa dalan.

Giduol dayon siya sa usa ka lalaki nga nagsul-ob og itom nga sinina ug pugsanon kining gidala. Madungog sab sa CCTV nga nagpakiluoy si Leaño nga dili siya dalhon. Ang mga suspek sakay og pulang awto pagdagit kang Leaño.

Pasado alas-1 sa hapon nakaplagan ang iyang patay’ng lawas sa daplin sa dalan sa Sitio Morga, Barangay Sudlon 1, Cebu City. Naa siyay mga samad pinusilan sa ulo ug lawas.

Nakit-an usab nga gihigot ang iyang duha ka pulso sa atubangan gamit ang pisi sa manok. 

Naghimo na og joint investigation ang Cebu City Police Office (CCPO) ug Cebu Provincial Police Office (CPPO).

Nailhan na usab sa kapulisan ang usa sa mga posibleng suspek sa maong krimen apan wala pa natino ang motibo sa pagdagit ug pagpatay kang Leaño.—  IBM BANAT NEWS