CCMC giandam sa posibleng pagdasa sa mga pasyente

CEBU, Philippines — Giandam na sa kagamhanan sa Dakbayan sa Sugbo ang Cebu City Medical Center (CCMC) alang sa posibleng pagdagsa sa mga pasyenteng adunay respiratory illnesses tungod sa dili maayong kalidad sa hangin o gumikan sa haze nga gikan sa forest fire sa Indonesia.

Base sa ulahing advisory sa Department of Environment and Natural Resources-Environmental Management Bureau (DENR-EMB)-7 niabot na sa 252 ang Air Quality Index (AQI) sa Metro Cebu sa alas 11 sa buntag kagahapon, Septyembre 3, 2026 nga gi-classify nga “Acutely Unhealthy” ug dili kini maayo alang sa mga tawo nga hubakon, adunay sakit sa kasing-kasing ug baga.

Matud ni Konsehal Dave Tumulak, tsirman sa Committee on Health nga nakigtagbo siya sa mga doktor sa CCMC alang sa preparasyon sa tambalanan human gipahibalo nga kinahanglan ang pagpangandam kong mosamot ang epekto sa haze.

Positibo si Tumulak nga andam na ang CCMC ug nagpakatap na ang City Health Department og mga nebulizer ug uban pa’ng medical supplies nga gikinahanglan sa mga pasyenteng adunay sakit sa baga.

Giawhag sa konsehal ang mga barangay health center nga kanunay nga andam nga motubag sa mga residente nga nanginahanglan og nebulizer, oxygen ug uban pa’ng basic respiratory care.

Matud usab ni Tumulak nga dili kinahanglan nga idiretso sa CCMC ang mga minor o gamay ra nga sintomas sama sa ubo nga mahimong nalambigit sa haze.

Mas maayong moduol una sa barangay health center aron malikayan ang paghuot sa CCMC ug mahatagan og prayoridad ang mas seryosong mga kaso. Apan kong ang pasyente adunay respiratory illness nga adunay komplikasyon girekomenda nga dad-on kini sa tambalanan aron maatiman og tarong.  Sukad niadtong Sabado nakatala na ang CCMC og minor cases nga nalambigit sa unhealthy air quality sa siyudad.

 Apan matud ni Tumulak nga wala pa kini giisip nga makaalarma sa pagkakaron.

Gilaoman usab nga magpadayon ang dili maayong kalidad sa hangin hangtud Sabado o Dominggo base sa mga weather forecast nga ilang nadawat.

Malaomon si Tumulak nga sa sunod semana mausab ang direksyon sa hangin ug moarang-arang ang kalidad sa hangin.

Samtang nagpadayon ang haze, giawhag usab ang publiko nga likayan una ang paggawas sa balay kong dili kinahanglan.

Ug kong kinahanglan mogawas ilabi na sa mga lugar nga taas ang polusyon girekomenda ang paggamit og N95 mask. (BANAT NEWS)