Progella, Pagara buhay pa sa Round of 16
MANILA, Philippines — Pinalakas nina Khylem Progella at Sofiah Pagara ng Alas Pilipinas Women ang tsansa sa Round of 16 matapos ang 21-5, 21-7 demolisyon kina Zamira Shagraeva at Odina Uralova ng Uzbekistan sa 2026 AVC Beach Volleyball Continental Championship kahapon sa Shangluo, China.
Ito ang ikalawang sunod na panalo nina Progella at Pagara sa Pool C ng women’s division.
Nagmula ang 2026 Volleyball World Beach Pro Tour Futures champion duo sa 21-13, 21-14 paggupo kina Kristina Karimova at Yekaterina Ryukhova ng Kazakhstan noong Miyerkules.
Samantala, bumangon sina Sisi Rondina at Bernadeth Pons mula sa naunang kabiguan para talunin sina Guzaloy Mamatsodikova at Malikakhon Tursunpulatova ng Uzbekistan, 21-8, 2-18, sa Pool E.
Nakatakda pang harapin ng ‘SiPons’ sina Jasmine Fleming at Elizabeth Alchin ng Australia kagabi habang isinusulat ito.
Bagsak sa ikatlong sunod na kamalasan sina Alas Pilipinas Men tandem James Buytrago at Ronniel Rosales mula sa 12-21, 17-21 pagkatalo kina Mark Nicolaidis at Izac Carracher ng Australia at 18-21, 18-21 pagsuko kina Jad Abi Karam at Hadi El Chabin ng Lebanon sa Pool C ng men’s division.
- Latest
