EDITORYAL - ASF sa Sugbu ug sa Negros

Nitiyabaw na ang mga namuhi og baboy sa Negros tungod sa padayung pagdili sa Cebu pagdawat sa ilang mga baboy para sa merkado dinhi.

Tungod ni sa hugot nga implimentasyon sa pag-ban sa probinsya sa tanang matang sa produktong gikan sa baboy ug mga buhi nga baboy tungod sa hulga sa African Swine Flu.

Dili palang dugay, ubay-ubay nga mga buhing baboy ang suway unta gipalusot og pasulod dinhi sa Cebu pinaagi sa pagkarga niini sa mga gagmay nga pumpboat, apan nasakpan gihapon.

Pero walay nakasiguro kung tanan bang gisuwayan og palusot dinhi nangasakpan ba gyud, kay tungod sa kalapad sa kabaybayonan sa Cebu, posibleng naa gyuy pipila nga nakalusot.

Gawas pa ana, nakuyawan ang uban kay basin nataptan na sa maong sakit ang ilang igbaligyaay nga baboy unya maabtan og kamatayon nga dili pa nila madispatsar.

Tungod ana, daghan sa mga namuhi og baboy didto sa Negros ang nibaligya nalang sa baratong presyo kaysa mosugal sila og paabot hangtud kanus-a makabalik og hatud og baboy dinhi sa Sugbu.

Masabtan nga dako gyud ning problema sa ilang industriya didto sa Negros, pero husto man ning gihimo ni Gob. Pamela Baricuatro nga lugwayan pa ang ban sa mga baboy gikan sa mga probinsyang natakboyan og ASF.

Proteksyon ni para sa lokal nga industriya sa pagpamuhi og baboy dinhi sa Sugbu. Kay kun mahitabo napud ang nahitabo sa una nga nasudlan og ASF ang Sugbu, dako sab kining problema.

Bisan ang Cebu anang panahona wala na makabaligya og baboy sa gawas sa probinsya tungod kay wala say probinsyang mosugot nga makasulod ang mga baboy gikan sa Cebu tungod sa ASF dinhi.

Sa laktod, patas ra ang nahitabo karon. Ang maayong buhaton mao ang pagsunod sa tanang mga gipangtudlo sa mga ahensiya sa gobiyerno kun unsaon nga malikayan ang pakatap sa maong sakit diha sa mga binuhing baboy para dili mawala ang panginabuhian.

Nitiyabaw ang mga negosyante og baboy sa Negros tungod kay matag adlaw nga wala mahalin ang ilang mga baboy, kada adlaw silang naalkanse niini tungod sa gastos sa lawog. Magkadugay ang baboy, magkadako ang gastos sa lawog.