Pukaw sa nakalimtan nga food control

Tungod kay nakalimtan naman ang isyu sa flood control nga nakausik og binilyon o trilyon nga salapi sa katawhan, ang kinaiyahan na ang nipahinumdom sa katawhan karon pinaagi sa nasinati nga halapad nga pagbaha didto sa Luzon nga hilabihan ka lawom. May mga balay nga gilamoy sa baha ilabi na didto sa Pampanga ug naa usay tulay nga naguba sa Tarlac.

Dili nako makalimtan ang gitubag sa akong nainterbyu dihang naghimo ako og istorya bahin sa baha sa Barangay Tisa sa dakbayan sa Sugbo. Matud sa usa ka babaye, mas maayo kunong tutokan niya ang kaso sa impeachment batok ni Bise Presidente Sara Duterte kaysa magsigag hisgot sa kontrobersiya sa flood control. Pastilan, wala ko kasagang sa iyang gipanulti—mas palabihon pa ang pagpangmarites sa kaso batok sa bise presidente kaysa sa mas dakong isyu sa kurapsyon sa flood control.

Natay-og ang nasod dihang mibuto ang isyu sa flood control nga nakahaling gani sa kasuko sa mga tawo. Dunay gipahigayon nga imbestigasyon apan hangtod karon wala may napadulngan. Naay mga napasakaan og kaso apan kadtong mga gisakripisyo ra man nila, samtang kadtong mga main character padayon ang happy-happy sa kinabuhi.

Samot na karon nga nibakwi na sa ilang testimonya ang 18 ka marines ug si Guteza batok kang kanhi House SpeakerRomualdez, kinsa na man lang ang mga nagpabilin nga credible witness? Makita na nato ang pagkahan-ay nga dili gyud molampos ang kaso batok kang Romualdez. Kon masang-at man, mabasura ra usab kini tungod sa teknikalidad.

Mora og nakasulat nang daan sa script apil ang wala pagkagakop ni Zaldy Co. Sa tinuod lang, kon mapabalik sa nasod si Zaldy Co, siguradong matumbok niini ang kinadak-ang isyu ug palig-onon pa sa pamahayag ni Romualdez.

Malimtanon ang mga tawo sa isyu—maayo lang sa sinugdanan, mag-rally-rally dayon, apan sama sa bul-og sa baha, naanod na ang kasibot sa mga tawo sa dakong problema nga hinungdan sa kalisod karon. Naa na gyud ang tubig sa sentro sa gobyerno aron makita ug masinati ang daotang epekto niini.

Makahinumdom lang ang mga tawo kon nalubog na sa baha. Maayo man kadtong mga nangurakot kay dili man makaubog sa tubig kay daghang balay—pili-pili lang kon asa ang luwas sa baha ug dali nga makabalhin—apan kadtong mga pobre, aw, antos sa kalbaryo.

Tungod sa kakalimbatnan sa mga tawo, nakatutok na lang kini sa drama sa impeachment hearing batok ni VP Sara, ug nakamata na lang nga nilutaw na sa baha ang ilang balay. Sama usab ang mga opisyal sa gobyerno nga gustong dili mabuking nga apil sa flood control, busa naningkamot gyud nga malihis ang isyu ngadto sa VP.

Ang pangutana: Unsa man ang nahimo sa Senado ug Kongreso karon sa pagsulbad sa problema sa baha? Wala, kay dili man sila ang personal nga nag-antos—ang mga tawo ra man nga mga uto-uto nga nituo gihapon sa ilang mga bulatik. Unta mahigmata na ang tanan sa pagpukaw sa kinaiyahan bahin sa kadako sa problema nga atong giatubang.