Tinigbasay, senior patay
CEBU, Philippines — Patay ang usa ka 73-anyos nga mag-uuma samtang nasamdan ang usa ka 37-anyos nga construction worker human silang duha nagtinigbasay atol sa ilang panag-inom sa Purok Mahogany, Barangay El Pardo, Boljoon, Cebu, pasado alas-11 sa gabii niadtong Biyernes, Agosto 28, 2026.
Ang namatay mao ang mag-uuma nga nasamdan sa ulo ug gidunggab sa tiyan gamit ang sundang, samtang samdan sa wala nga bukton ang construction worker niya nga nakatinigbasay.
Base sa imbestigasyon sa kapolisan, nag-inom ang duha apan naay gikabiklan ug nisangpot sa panaglalis tungod sa ilang kahubog.
Misamot ang ilang panaglalis hangtod nga mibiya ang mag-uuma apan nibalik nga nagdala og sundang. Gikatahong gitigbas niini ang construction worker apan nakasagang kini sa iyang bukton .
Naglinayugay ang duha hangtud nga nailog sa construction worker ang sundang ug gigamit ni pagtigbas ug pagdunggab sa senior citizen.
Gidala pa sa Oslob District Hospital ang mag-uuma alang sa pagtambal apan gideklarang patay na sa doktor.
Samtang, naaresto sa mga pulis ang construction worker ug narekober usab ang sundang nga gigamit sa krimen.
Gipatambalan ang suspek sa iyang samad ug gidala sa detention cell sa Boljoon Municipal Police Station samtang naghulat sa pagsaka og kaso nga homicide batok kaniya.(CEBU NEWS)
- Latest
